ඉදිරියේදී පිහිටවනු ලබන ආණ්ඩුවකට සහාය ලබාදෙන්නේ කුමන ආකාරයකටදැයි යන්න පිළිබඳව තිරණය කිරීම වෙනුවෙන් කරුණු 7ක් සම්බන්ධයෙන් පිළිතුරු විමසා අග්‍රාමාත්‍ය රනිල් වික්‍රමසිංහ මහතා වෙත සමගි ජන බලවේගයේ පාර්ලිමේන්තු මන්ත්‍රිවරුන් වන මනූෂ නානායක්කාර මහතා හා හරීන් ප්‍රනාන්දු මහතා ලිපියක් යොමුකර තිබේ.

අග්‍රාමාත්‍ය කාර්යාලයේ වියදම් ජුනි මස සිට සියයට පනහකින් කපා හැරිමට තීරණය කර තිබේ. අග්‍රාමාත්‍ය රනිල් වික්‍රමසිංහ මහතාගේ උපදෙස් අනුව අග්‍රාමාත්‍ය ලේකම් සමන් ඒ්කනායක මහතා මෙම පියවර ගෙන තිබේ.

ගෑස් රැගත් නෞකා තුනකට මුදල් ගෙවීමට හැකිවීම හේතුවෙන් ඉදිරි දින කිහිපය තුළ ගෘහස්ත ගෑස් සිලින්ඩර වෙළඳපොළට නිකුත් කිරීමට හැකිවෙනු ඇතැයි ලිට්‍රෝ සමාගම කියයි.

කොළඹ ගෝල්ෆේස් පිටියේ හා අරලිය ගහ මන්දිරය ඉදිරිපිට පවත්වාගෙන ගිය සාමකාමි විරෝධතාව සඳහා පහරදීමේ චෝදනා යටතේ පාර්ලිමේන්තු මන්ත්‍රී මිලාන් ජයතිලක මහතාද අපරාධ පරීක්ෂණ දෙපාර්තමේන්තුව මගින් අත්අඩංගුවට ගෙන තිබේ.

නාවලපිටිය නගර මධ්‍යයේ පිහිටි මහින්දානන්ද අලුත්ගමගේ පදනම කාර්යාලයට පහර දුන්නේ යැයි කියන සිද්ධිය සම්බන්ධයෙන් චෝදනා ලැබ සිටින තවත් සැකකරුවන් දස දෙනෙක් අද (17දා) නාවලපිටිය පොලිසියට භාර විමෙන් අනතුරුව එම සැකකරුවන් දස දෙනා නාවලපිටිය මහෙස්ත්‍රාත් අධිකරණය වෙත ඉදිරිපත් කරනු ලැබුහ.

පසුගිය 09 වැනි දින ගෝඨාගෝගම සහ මයිනාගෝගම සාමකාමි අරගල භූමි වෙත පහරදීම සම්බන්ධයෙන් චෝදනා ලැබූ පොදුජන පෙරමුණු පාර්ලිමේන්තු මන්ත්‍රී සහ හිටපු අමාත්‍ය සනත් නිශාන්ත අත්අඩංගුවට ගෙන තිබේ.

‘ගෝඨා ගෝ ගම’ සහ ‘මයිනා ගෝ ගම’ සාමාකාමී උද්ඝෝෂකයින්ට පොලු මුගුරු වලින් සන්නද්ධ පිරිසක් ගොස් කළ පහරදීමේ සිද්ධීන් වලට සම්බන්ධ පුද්ගලයින් ඉදිරි දින 02 තුළ අත්අඩංගුවට ගන්නා බව පොලිස්පතිවරයා සහ රහස් පොලිසිය බාර ජ්‍යෙෂ්ඨ නිලධාරීන් දැනුම් දුන් බව ශ්‍රී ලංකා නීතීඥ සංගමය දැනුම් දී ඇත.

ශ්‍රී ලංකා පොදුජන පෙරමුණේ පොළොන්නරු දිස්ත්‍රික් පාර්ලිමේන්තු මන්ත්‍රී අමරකීර්ති අතුකෝරළ මහතා පසුගිය 9 වැනිදා මිය යාමෙන් පුරප්පාඩු වූ එම මන්ත්‍රී ධූරය සඳහා ශ්‍රී ලංකා පොදුජන පෙරමුණේ පොළොන්නරු දිස්ත්‍රික්කයේ මනාප ලැයිස්තුවේ 5 වන ස්ථානයේ රැඳී සිටින ජගත් සමරවික්‍රමට මහතාට එම අවස්ථාව හිමිව තිබේ.

අරලියගහ මන්දිරය ඉදිරිපිට සහ ගාලුමුවදොර ජනාධිපති කාර්යාලය ඉදිරිපිට දී අරගලකරුවන්ට පසු ගිය 09 වැනිදා එල්ල වූ ප්‍රහාරය සම්බන්ධයෙන් ප්‍රකාශයක් ලබාදීම සදහා බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් මහතා අද (17දා) මීට ටික වේලාවකට පෙර අපරාධ පරීක්ෂණ දෙපාර්තමේන්තුව වෙත පැමිණියේය.

ලොරියේ ඩීසල් ඉන්ධන ඉවර වීමෙන් අනතුරුව කෑන් එකක් රැගෙන පිරවුම්හලට පැමිණියත් කෑන් වලට ඉන්ධන ලබා නොදෙන බවට පොම්ප කරුවන් පැවසීමෙන් අනතුරුව එම රියදුරු විසින් ලොරියේ ඉන්ධන ටැංකිය ගලවාගෙන යතුරුපැදියක ගැටගසාගෙන පැමිණ සිටින අයුරු බණ්ඩාරගම නගරයේ දී දක්නට ලැබුණි.

හෙට (18) දිනයේ දී පැය 3යි මිනිත්තු 40ක විදුලි කප්පාදුවක් සඳහා අනුමැතිය ලබාදුන් බව මහජන උපයෝගීතා කොමිසම සඳහන් කරයි.

බණ්ඩාරගම කිසිදු ඉන්ධන පිරවුම් හලක පෙට්‍රල් නොමැති වීම හේතුවෙන් පාරිභෝගිකයෝ බණ්ඩාරගම නගරයේ හොරණ මාර්ගය ත්‍රීරෝද රථ යොදා ඊයේ (17දා) අවහිර කළහ.

2021-2022 වර්ෂය සදහා පැවති ශ්‍රි පාද වන්දනා වාරය අද (17දා) දින අලුයමින් අවසන් කල බව ශ්‍රි පාදස්ථානාධිපති සබරගමු පළාත් ප්‍රධාන සංඝ නායක , ඌව වෙල්ලස්ස විශ්ව විද්‍යාලයේ කුලපති , පැල්මඩුල්ල රජ මහා විහාරස්ථානයේ විහාරාධිපති පුජ්‍ය බෙන්ගමුවේ ධම්මදින්න හිමියන් පැවසිය.

වර්තමාන පාර්ලිමේන්තුවේ පවතින සංස්කෘතිය සමග ඉදිරියට යා නොහැකි බවත්, ඒ අනුව පාර්ලිමේන්තු සභාවක් නිර්මාණය කිරීමට යෝජනා කරන බවත් අග්‍රාමාත්‍ය රනිල් වික්‍රමසිංහ මහතා පැවසීය.

අධික ලෙස මත්පැන් පානය කර පොලිස් ස්ථානාධීපතිවරයාගෙන් සෙට් වෙමුදැයි දුරකතනයෙන් විමසා පසුව පොලිස් ස්ථානයට ද පැමිණ කලහකාරීව හැසිරුණු පුද්ගලයකු ඊයේ (16දා) රාත්‍රියේ සැකපිට අත්අඩංගුවට ගත් බව කන්දකැටිය පොලිසිය පවසයි.

ඉහළ නැග තිබු ගිංගගේ ජල මට්ටම මේ වනවිට අඩුවෙමින් පවතින අතර අද (17) උදෑසන 7.00 වනවිට ගිංගගේ බද්දේගම ජල මාපකයේ ජල මට්ටම මිටර් 4.25ක් ලෙස සටහන්ව තිබු බව ගිංගග වාරිමාර්ග ඉංජිනේරු පි.ආර්. ද සිල්වා මහත්මිය සදහන් කළාය.

මැයි මස 18 වැනිදාට යෙදී ඇති 13 වන යුද සැමරුම වෙනුවෙන් මුලතිව් වෙල්ලමුල්ලි වයික්කාල් යුද සැමරුම් ස්ථානයේදී කිසිදු අයුරකින් කොටි ත්‍රස්ත නාම හෝ සංකේතයක් හෝ යොදානොගෙන සැමරීම් සිදුකිරීමට අවසරය ඇති බවට මුලතිව් පොලීසිය විසින් එහි සංවිධායකයින්ට දැනුම් දී තිබේ.

ජනපතිවරයාට අප්‍රසාදය පළ කිරීමේ යෝජනාව විවාදයට ගැනිම වෙනුවෙන් ස්ථාවර නියෝග අත්හිටුවීමට අදාළව පැවැත්වූ ඡන්ද විමසීමෙන් ආණ්ඩුව ජයගත්තේය.

ඔවුන්ගේ ඡංගම දුරකථන ඉන්දික අනුරැද්ධ සහ ඩී. වීරසිංහ යන මන්ත්‍රීවරුන් දෙදෙනා විසින් එම අවස්ථාවේ මන්ත්‍රීවරුන්ගේ භාරයට ගෙන ඇති අතර, පසුව කථානායක මහින්ද යාපා අබේවර්ධන මහතාට අසලට පැමිණ ඔහුට එම දුරකථන ලබා දීමට මන්ත්‍රීවරුන් දෙදෙනා කටයුතු කළහ.

පාර්ලිමේන්තුවේ ස්ථාවර නියෝග අත් හිටු වීම සම්බන්ධයෙන් ඡන්ද විමසීමක් කිරීමට කතානායක මහින්ද යාපා අබේවර්ධන මහතා තීරණය කළේය.

අරලියගහ මන්දිරය ඉදිරිපිට හා ගාලුමුවදොර ජනාධිපති ලේකම් කාර්යාලය ඉදිරිපිට පැවති විරෝධතාවයට පහර දීමට අදාලව නීතිපතිවරයා විසින් ලබා දී ඇති උපදෙස් අනුව කටයුතු කරන ලෙසට පොලිස්පති සී ඩී වික්‍රමරත්න මහතා අපරාධ පරීක්ෂණ දෙපාර්තමේන්තුවට උපදෙස් ලබා දී තිබේ.

අද වන විට ඩොලරයක් වෙනුවෙන් ගෙවිය යුතු රුපියල් අගය 425.71ක් බවට (spot exchange rate) පත්ව ඇතැයි ලෝකප්‍රකට ආර්ථික විද්‍යාඥයෙක් වන ස්ටීව් හැන්කේ මහතා පැවැසීය.

ඡන්ද 109ක් ලබාගනිමින් නියෝජ්‍ය කථානායකවරයා ලෙස පත්වීමට ආණ්ඩු පක්ෂයෙන් යෝජනා කළ අජිත් රාජපක්ෂ මහතා පත්ව තිබේ. විපක්ෂය විසින් ඉදිරිපත් කළ රොහිනී කවිරත්න මහත්මිය ඡන්ද 78ක් ලබාගත්තාය. අවලංග වූ ඡන්ද සංඛ්‍යාව 23කි.

රාජපක්ෂ පවුලේ මහින්ද රාජපක්ෂ හා නාමල් රාජපක්ෂ යන මන්ත්‍රිවරුන් අද දිනයේදී පාර්ලිමේන්තු සභා ගර්භයට නොපැමිණියේය.

අවසන් සටනේදි ගැටුම්වලට මැදිවි මියගිය පිරිස් ස්මරණය කිරිම සදහා අම්පාර පොතුවිල් සිට රිය පෙරහැරකින් පැමිණි යුද්ධයේදි අතුරුදහන් වූ හා මියගිය අයගේ ඥාතීන් පිරිසක් අද (17දා) ත්‍රිකුණාමලය සිවන්කෝවිල අසලින් මුලතිව් වෙල්ලමුල්ලි වයික්කාල යෑම සදහා ගමන් ඇරඹීය.

නියොජ්‍ය කථානායකවරයෙක් පත්කර ගැනීම වෙනුවෙන් පැවැති ඡන්ද විමසීම අවසන් ව තිබේ. ඒ් අනුව මේ වන විජ ඡන්දය ගණන් කිරීමේ කටයුතු ආරම්භ වී තිබේ.

පාර්ලිමේන්තුව තුළ නියෝජ්‍ය කථානායක වරයෙක් පත්කර ගැනීම වෙනුවෙන් රුපියල් මිලියන ගණනක් වැය කරමින් අද දිනයේදී ඡන්දයක් පැවැත්වීමට නියමිතය.

මන්ත්‍රීවරුන්ගේ ආරක්ෂාව තහවුරු කරන ලෙසත් ඒ අනුව ඔවුන්ගේ නිවෙස්වත ලබාදි ඇති ආරක්ෂාව මෙන්ම පාර්ලිමේන්තුවට පැමිණීමේදී හා පිටව යාමේදී ලබාදෙන ආරක්ෂාව වැඩි කරන ලෙස තමන් ඉල්ලා සිටින බව කථානයක මහින්ද යාපා අබේවර්ධන මහතා පැවැසීය.

දියත උයන අසල පාර්ලිමේන්තු පිවිසුම් මාර්ගය වසා ඇති බව පොලිසිය පවසයි. එම නිසා මෙම ප්‍රදේශයේ දැඩි රථවාහන තදබදයක් හටගෙන ඇති බවත් වාහන ගමනාගමනය සඳහා විකල්ප මාර්ග භාවිත කරන ලෙසත් පොලිසිය දැනුම් දී තිබේ.