GSP ප්ලස් රැක ගැනීමට නීති කෙටුම්පත් ප්‍රවේශමෙන් සමාලෝචනය කරන්න
යෝජිත, ත්‍රස්තවාදයෙන් රාජ්‍යය ආරක්ෂා කිරීමේ පනත (PSTA) පිළිබඳ සිය නිරීක්ෂණ ඉදිරිපත් කර ඇති අතර, යෝජිත සංවිධානාත්මක අපරාධ වැළැක්වීමේ පනත පිළිබඳ සිය අදහස් දැක්වීම් අවසන් කිරීමේ කටයුතු ද මේ වනවිට සිදු කෙරෙමින් පවතින බවත්, ඒ අනුව එය ඉක්මනින් අදාළ බලධාරීන්ට දැනුම් දෙන බවත් ලංකා වාණිජ මණ්ඩලය නිවේදනය කරයි.
මෙහිදී ජාතික ආරක්ෂාව ශක්තිමත් කිරීමට සහ නැගීඑන අභියෝගවලට මුහුණ දීමට රජයේ උත්සාහයන් අගය කරන අතරම, මෙම නීති කෙටුම්පත්වල පැහැදිලි අර්ථ දැක්වීම්, සුදුසු නීතිමය අධීක්ෂණයක් සහ ප්‍රමාණවත් ආරක්ෂණ ක්‍රියාවලි සපයන බව සහතික කිරීම සඳහා මෙම නීති කෙටුම්පත් ප්‍රවේශමෙන් සමාලෝචනය කරන ලෙස ලංකා වාණිජ මණ්ඩලය රජයෙන් ඉල්ලා සිටියි.
ආයෝජක විශ්වාසය, නීතිමය නිශ්චිතභාවය මෙන්ම, වෙළෙඳාම සහ ආයෝජන සඳහා පුරෝකථනය කළ හැකි සහ නීති රීති මත පදනම් වූ ගමනාන්තයක් ලෙස ශ්‍රී ලංකාව සතු කීර්ති නාමය පවත්වාගෙන යාම සඳහා මෙවැනි පියවර අත්‍යවශ්‍ය වේ.
අපනයන, රැකියා උත්පාදනය, විදේශ විනිමය ඉපැයීම් සහ ආර්ථික වර්ධනයට සහාය වීමෙහිලා තීරණාත්මක කාර්යභාරයක් ඉටු කරන, යුරෝපා සංගමයේ GSP+ වෙළෙඳ සහනය සඳහා ශ්‍රී ලංකාවට පවතින ප්‍රවේශය අඛණ්ඩව පවත්වාගෙන යාමේ වැදගත්කම ද වාණිජ මණ්ඩලය විසින් අවධාරණය කර ඇත.
මේ සම්බන්ධයෙන්, නව නීති සම්පාදනය ශ්‍රී ලංකාවේ ජාත්‍යන්තර බැඳීම් සහ ජාත්‍යන්තරව පිළිගත් ප්‍රමිතීන් සමඟ අනුකූල වන ලෙස සකස් කළ යුතු බවට වාණිජ මණ්ඩලය අවධාරණය කර ඇත; එමගින් GSP+ ප්‍රතිලාභ අඛණ්ඩව ලබා ගැනීමේ අවස්ථාවන් තවදුරටත් ශක්තිමත් වනු ඇත.
ව්‍යවස්ථාදායක ප්‍රතිසංස්කරණ මගින් ජාතික ප්‍රමුඛතා ඵලදායී ලෙස ආමන්ත්‍රණය කරන අතරම ආර්ථික වර්ධනය, තරඟකාරිත්වය සහ තිරසාර සංවර්ධනයට සහාය වීම සහතික කිරීම සඳහා ප්‍රතිපත්ති සම්පාදකයින් සහ අනෙකුත් පාර්ශ්වකරුවන් සමඟ ඵලදායී ලෙස සම්බන්ධ වීමට ලංකා වාණිජ මණ්ඩලය කැපවී සිටී.
popular news
ඔබේ අදහස් එවන්න.
ඔබේ අදහස් සිංහලෙන්, ඉංග්රීසියෙන් හෝ සිංහල ශබ්ද ඉංග්රීසි අකුරෙන් ලියා එවන්න.
