රිය අනතුරු දෙකකින් 11ක් තුවාල ලබයි

මාවනැල්ල හා ගිනිගත්හේන ප්‍රදේශයේ සිදුවූ රිය අනතුරු දෙකකින් පුද්ගලයන් 11ක් තුවාල ලබා රෝහල් ගතකර ඇතැයි පොලීසිය පවසයි.

පහළ කඩුගන්නාවේදී වෑන් රථයක් රියදුරුට පාලනය කරගත නොහැකිව මීටර් 20ක් පමණ ප්‍රපාතයකට පෙරළීමෙන් වෑන් රථයේ ගමන් ගත් පුද්ගලයන් සිව් දෙනෙකු තුවාල ලබා මහනුවර මහ රෝහලට ඇතුළත් කර තිබේ.

මහනුවර හන්තාන ප්‍රදේශයේ අවමඟුල් උත්සවයකට සහභාගිවී නැවත යමින් සිටියදී මෙම අනතුරු අද අලුයම සිදුව තිබේ.

මේ අතර ගිනිගත්හේන පොලිස් වසමේ දියගල ප්‍රදේශයේදී පුද්ගලික බස්  රථ දෙකක් මුහුණට මුහුණ ගැටීමෙන් සිදුවූ රිය අනතුරකින් මගීන් 07 දෙනෙකු තුවාල ලබා ප්‍රතිකාර සඳහා වටවල හා නාවලපිටිය රෝහල් වෙත ඇතුළත් කර තිබේ.

අද පෙරවරු 8.30ට පමණ මෙම අනතුර සිදුව තිබේ.