බුවනෙකබා රාජසභා ගොඩනැගිල්ල කැඩීමේ නඩුවේ ගාස්තු නගර සභාවෙන්

බුවනෙකබාහු රාජසභා මණ්ඩපය කැඩීමේ සිද්ධිය සම්බන්ධයෙන් පවරා ඇති නඩුවේ කුරුණෑගල නගරාධිපතිවරයා ඇතුළු නිලධාරීන් වෙනුවෙන් නීතිමය කටයුතු සඳහා වැයවන ගාස්තු සභාව විසින් දැරිය යුතු බවට විපක්ෂයේ නාගරික මන්ත්‍රීවරයකු විසින් අද  (10දා) පැවති කුරුණෑගල මහ නගර සභාවේ මාසික සභා රැස්වීමට ඉදිරිපත් කළ යෝජනාවක් වැඩි ජන්ද 14 කින් සභා සම්මත විය.

කුරුණෑගල මහ නගර සභාවේ විපක්ෂයේ (එජාප) මන්ත්‍රීවරයකු වන බුද්ධික ඇල්ලේපොළ මහතා එම යෝජනාව මන්ත්‍රී යෝජනාවක් ලෙස සභාවට ඉදිරිපත් කළේය.

එම යෝජනාවට පක්ෂව ආණ්ඩු පක්ෂයේ පොදුජන පෙරමුණේ මන්ත්‍රීවරුන් සහ විපක්ෂයේ එජාප මන්ත්‍රීවරුන් 17 දෙනෙකු ජන්දය ලබාදුන්හ. ආණ්ඩු පක්ෂය නියෝජනය කරන හිටපු නගරාධිපති ගාමිණී පෙරමුණගේ සහ විපක්ෂයේ මන්ත්‍රීවරුන් වන සුමේධ අරුණශාන්ත සහ විශාඛා අබේසිංහ මහත්ම මහත්මීන් යෝජනාවට විරුද්ධව ජන්දය දුන්හ. මන්ත්‍රීවරුන් දෙදෙනෙකු සභා රැස්වීමට සහභාගි නොවූහ.