නැදුන්ගමුවේ රාජා හස්තියාගේ මුද්දරය නිකුත් කෙරේ

ආසියාවේ විශාලතම හීලෑ හස්තියා ලෙස නම් දරා ඇති නැදුන්ගමුවේ රාජා හස්තියා විසින් සිදු කළ ආගමික හා සංස්කෘතික මෙහෙවර අගයා , රුපියල් 15ක්  වටිනා තැපැල් මුද්දරයක් සහ මුල්දින කවරයක් නිකුත් කිරිම අද  (30) පෙරවරුවේ සිදු කෙරිණි. 

තැපැල් දෙපාර්තමේන්තුවේ මුද්දර කාර්යාංශයේ සංවිධානත්වයෙන් හා අමාත්‍ය බන්දුල ගුණවර්ධන මහතාගේ ප්‍රධානත්වයෙන් රාජා හස්තියාගේ  හිමිකරු වන හර්ෂ ධර්මවිජය වෛද්‍යාචාර්ය වරයාගේ නැදුන්ගමුව නිවසේ පැවති  උත්සවයේදි  මෙම  මුල්දින කවරයක් නිකුත් කිරීම සිදු විය.

සියම් මහානිකායේ  බස්නාහිර පළාතේ අධිකරණ සංඝනායක තලංගල්ලේ සෝමසිරි නාහිමියන් ප්‍රධාන මහා සංඝරත්නය විසින් රාජා හස්තියාට සෙත්පතා පිරිත් සජ්ඣායනා කිරීමෙන් අනතුරුව බන්දුල ගුණවර්ධන සහ රාජ්‍ය අමාත්‍ය ලක්ෂ්මන් යාපා අබේවර්ධන යන මහත්වරුන් ප්‍රධාන ආරාධිතයින්ගේ සහභාගිත්වයෙන් 2354 වන මුල්දින කවරය නිකුත්කිරීම  ලෙස හස්තියෙකු වෙනුවෙන් නිකුත් වන දෙවන අවස්ථාව වශයෙන්  සුභ මොහොතින් මුද්දරය සහ මුල්දින කවරයක් නිකුත් කිරීම සිදු කෙරිණි. 

මෙහිදී අමාත්‍ය බන්දුල ගුණවර්ධන මහතා අදහස් දක්වමින්, මෙරට බෞද්ධ ශාසනික ඉතිහාසය තුළ  දළදා කරඩුව වැඩිම වාරයක් වැඩම කරවූ නැදුන්ගමුව රාජා හස්තියා වෙනුවෙන් මෙලෙස මුල්දින කවරයක් නිකුත් කිරීම සිදුවිම  ගැන සතුටට පත් වන බවත් රාජා හස්තියා රැකබලාගැනීම වෙනුවෙන් නැදුන්ගමුවේ ධර්මවිජය පරපුරට ගෞරවය පුද කරන බවත්ය. 

පසුගිය වකවානුව තුළ  අලි ඇතුන් සම්බන්ධයෙන් භික්ෂූන් වහන්සේලා පිරිසක් සිරගත කළා. පෙරහර වලට අලි ඇතුන් නැතුව ගියා. මෙය අපේ සංස්කෘතික උරුමයට පහරක් උනා. එම යුගය අවසන් කර නව ගමන් මගක යමින්  ජනාධිපති ගෝඨාභය රාජපක්ෂ මහතා සහ අග්‍රාමාත්‍ය මහින්ද රාජපක්ෂ මහතාගේ උපදෙස් මත නැදුන්ගමුව රාජා හස්තියා වෙනුවෙන් මෙලෙස මුල්දින කවරයක් නිකුත් කිරීම සිදු කරනු ලබනව.මෙම ඇත් පරපුර රැකබලා ගැනීම වෙනුවෙන් ධර්මවිජය වෙද පරපුරට සහ රාජා හස්තියාට දීර්ඝායු පතනව."

දළඳා මාලිගාවේ දිය වඩන නිලමේ වන ප්‍රදීප් දෑල බණ්ඩාර මහතා :- 

" 1985 වසරේදී  සබරගමුව මහා සමන් දේවාලයේ පෙරහරට සම්බන්ධවූ රාජා හස්තියා, 2005 වසරේ සිට දොළොස් වතාවක් දළදා පෙරහරේ සධාතුක කරඩුව වැඩමවීම සිදු කොට තිබෙනව. මෙම හස්තියාට තවත් දිගු කලක් මෙම අවස්ථාවට සහභාගි වීමට නීරෝගි සුවය සහ දීර්ඝායුෂ ප්‍රාර්ථනය කර සිටිනව.

අද වනවිට අලි ඇතුන් පෙරහර වලට නැතිව ගිහින් තිබුණත් කැලෑවේ සිටින අලි ඇතුන් සම්බන්ධ කර ගැනීමට රාජ්‍ය නොවන සංවිධාන වල විරෝධය පළව තිබෙනව. මෙය ඉතා කනගාටුදායක තත්ත්වයක්. මෙවන් සමයක ධර්මවිජය වෙද පරපුර මගින් කරන්නාවූ සේවය ඉතා අගය කරනව."

මෙම අවස්ථාවට වෛද්‍යාචාර්ය හර්ෂ ධර්මවිජය මහතාගේ ආරාධනය පරිදි  රාජ්‍ය අමාත්‍ය ලසන්ත අලගියවන්න, බස්නාහිර පළාත් සභාවේ සභාපති සුනිල් විජේරත්න, පාර්ලිමේන්තු මන්ත්‍රී ඩුලිප් විජේසේකර, අමාත්‍යාංශය ලේකම් වරුන් වන ඩබ්ලිව්. ඒ.චූලානන්ද සහ සුනන්ද මද්දුමබණ්ඩාර, තැපැල් මුද්දර කාර්යාංශයේ අධ්‍යෂක ශාන්ත මාගම්මන, ගම්පහ ප්‍රාදේශීය සභාවේ සභාපති රංජිත් ගුණවර්ධන ,ගම්පහ දිසාපති සුනිල් ජයලත් , ප්‍රාදේශීය ලේකම් සුරංගා ගුණතිලක ,ගම්පහ ජ්‍යෙෂ්ඨ  පොලිස් අධිකාරි ඉන්දික සිල්වා යන මහත්ම මහත්මීන් ඇතුළු ආරාධිතයින් පිරිසක් සහ සමස්ත ලංකා අලි ඇතුන්ගේ සංගමයේ සාමාජිකයින් පිරිසක්ද එක්ව සිටියහ.