ජනපති හා කෙන්යා ජනපති අතර හමුවක්

නයිරෝබි නුවර පැවැත්වෙන එක්සත් ජාතීන්ගේ පරිසර සමුළුවට සහභාගීවීම සඳහා ගිය ජනාධිපති ගරු මෛත්‍රිපාල සිරිසේන මහතා සහ කෙන්යා ජනාධිපති උහුරු කෙන්යාටා මහතා අතර හමුව ඊයේ (14) පස්වරුවේ සිදු විය.

එක්සත් ජාතින්ගේ පරිසර සමුළුවේ හතරවන සැසිවාරය ඉතා සාර්ථක අන්දමින් සංවිධානය කර තිබීම පිළිබඳ සිය සතුට පළ කළ ජනාධිපතිවරයා සමුළුවේ දී ගත් තීන්දු තීරණ ඉදිරියට ක්‍රියාවට නැංවීම සඳහා සාමාජික රටක් ලෙස ශ්‍රී ලංකාව උපරිමයෙන් කැපවී කටයුතු කරන බව සඳහන් කළේය.

කෙන්යා විදේශ කටයුතු ඇමතිනි  පසුගියදා ශ්‍රී ලංකාවේ සංචාරයක නිරත වූ අතර එහිදී දෙරටේ විදේශ අමාත්‍යවරු අතර පැවති සාකච්ඡාවලදී දෙරට අතර ඇතිකරගත් සහයෝගිතාවයන් ඉදිරියට ක්‍රියාවට නැංවීම පිළිබඳව ද නායකයන්ගේ අවධානය යොමු විය.

1970 වසරේ දී නිල රාජ්‍ය තාන්ත්‍රික සබඳතා පිහිටුවාගත් ශ්‍රී ලංකාව සහ කෙන්යාව අතර පවතින්නේ මිත්‍රශිලි සබඳතාවයකි.දෙරට ම පොදුරාජ්‍ය මණ්ඩලයේ හා ඉන්දියානු සාගර වටද්දර රටවල සංගමයේ (IORA) සාමාජික රටවල් වෙති.

ජනාධිපති ගරු මෛත්‍රීපාල සිරිසේන මැතිතුමාගේ මෙම සංචාරයත් සමඟ දෙරට අතර අන්‍යෝන්‍ය සහයෝගීතාවය ඉදිරියේ දී වඩාත් පුළුල් වනු ඇති බවට කෙන්යා ජනාධිපති උහුරු කෙන්යාටා මහතා විශ්වාසය පළ කළ අතර, ජාත්‍යන්තර තලයේ දී දෙරටම සහයෝගයෙන් කටයුතු කිරීමට ද නායකයෝ සහතික වූහ.