උපන් ගමන් බිළිඳා කෑලැවට විසි කළ මව අත්අඩංගුවට

තමන් විසින් ප‍්‍රසූත කළ දරුවා නිවස අසල  කැලෑවකට විසි කළ බව කියන තිස්හය හැවිරිදි තිදරු මවක් අද  (27)  අලූයම 05.30ට පමණ අත්අඩංගුවට  ගත් හම්බෙගමුව පොලීසිය විසිකළ දරුවාද සමග ඇය ඇඹිලිපිටිය දිසා මහ රෝහලට ඇතුල් කරනු  ලැබීය.

හම්බෙගමුව, රතඹලාගම ප‍්‍රදේශයේ කැලෑ රොදක බිළිදෙකු හඬන බවට පොලිස් හදිසි ඇමතුම් අංශයට කළ දැනුම් දීමක් අනුව හම්බෙගමුව පොලීසිය විසින් අත්අඩංගුවට ගැනිමෙන් පසු විසි කළ දරුවාද සොයාගෙන තිබුණි. දරුවා විසි කර ඇත්තේ පෙර දින (26) රාත‍්‍රී 09.30ට පමණ බව දැනගන්නට ලැබුණ බව පොලිසිය පැවසුවේය.

අත්අඩංගුවට පත්ව ඇත්තේ හම්බෙගමුව, රතඹලාගම ප‍්‍රදේශයේ පදිංචි විවාහක තිදරු මවකි.

පාන්දර 05.30 වනතුරු අලූත උපන් කිරිකැටි දරුවා සීතලයට ගැහෙමින්, කුසගින්නේ හඬමින් සිටියදි සොයාගෙන බිළිඳාගේ මව ද  සමග හම්බෙගමුව රෝහලට ඇතුළත් කිරිමෙන් පසු ඔවුන් දෙදෙනාම වහාම ඇඹිලිපිටිය දිසා මහ රෝහලට මාරුකර යවා ඇත.

හම්බෙගමුව පොලීසියේ ස්ථානාධිපති පොලිස් පරීක්‍ෂක ආර්. රාජපක්‍ෂ මහතාගේ මෙහෙයවීම මත උපන්ගමන් බිළිඳා  කැලේට විසි කිරිමට හේතු කුමක්ද යන්න සෙවීමට කාන්තා අංශයේ නිලධාරිනියන් ඇතුලූ නිලධාරීහූ වැඩිදුර පරීක්‍ෂණ පවත්වති.