වත්තල පෙරහර නිසා විකල්ප මාර්ග භාවිත කරන්න

වත්තල, හේකිත්ත ශ්‍රී සිව සුබ්‍රමනියම් ස්වාමි දේවාලයේ වාර්ෂික පෙරහර හේතුවෙන් මාර්ග තදබදයක් ඇතිවිය හැකි බව වත්තල පොලීසිය නිවේදනයක් නිකුත් කරමින් පවසයි.

ඒ අනුව හෙට (08දා) පස්වරු 2.30 සිට රාත්‍රී 9.30 දක්වා සහ පසුදා (09දා) පෙරවරු 6.00 සිට පෙරවරු 9.00 දක්වා පෙරහර වීථි සංචාරය කිරීමට කටයුතු යොදා ඇති බවද පොලිස් නිවේදනයේ සඳහන් වෙයි.

එම පෙරහර කෝවිල අසලින් ආරම්භ වී ඇළකට වංගුව, පල්ලිය වත්ත, ඇල්කන්ද හරහා නායකකන්ද හංදිය, අල්විස් ටවුන්, කෙරවලපිටිය, හැඳල පුරාණ විහාරය පසුකර, හැඳල පාරේ හැඳල හංදියෙන් පරණ මීගමු පාරෙන් ගාල හංදියට පැමිණ භේකිත්ත පාර හරහා නැවත දේවස්ථානයට පැමිණීමට නියමිතය.

මේ හේතුවෙන් එම කාලය තුළ මාර්ග තදබදයක් ඇතිවිය හැකි බැවින් හැකිතාක් විකල්ප මාර්ග භාවිත කරන ලෙස පොලීසිය මහජනතාවගෙන් ඉල්ලා සිටියි.