රට වටෙන් අදට

එජාපයට යන්නේ නෑ - නිකවැරටිය හිටපු සභාපති 

තමා එක්සත් ජාතික පක්ෂයට යන බවට වාර්තාවන තොරතුරු වල කිසිම සත්‍යතාවක් නැති බව නිකවැරටිය ප්‍රාදේශීය සභාවේ හිටපු සභාපති එස්. ඒ. ශ්‍රියානන්ද මහතා පැවැසීය.තමන් කිසිදිනෙක ශ්‍රී ලංකා නිදහස් පක්ෂය අතැර නොයන බවත් ඔහු සඳහන් කළේය. 

නිකවැරටිය ප්‍රියාණි මංගලිකා

කනන්විල සන්ධාන කාර්යාලයට අසූචි ප්‍රහාරයක් 

හොරණ කනන්විල ප්‍රදේශයේ ඇති එක්සත් ජනතා නිදහස් සන්ධාන මැතිවරණ මෙහෙයුම් කාර්යාලයට අසූචි ප්‍රහාරයක් එල්ල වි තිබෙනවා. කලු ගල්, වැලි හා අසූචි එක්ව මෙම ප්‍රහාරය එල්ල කර ඇති බව හොරණ පොලීසිය පැවැසුවා.

සුනිල් එස්. තන්ත්‍රිආරච්චි

වතු ජනතාවගේ ජල ප්‍රශ්නයට විසදුම් දෙනවා - ප්‍රියානි විජේරත්න

ඡන්දය ලබා දුන්නත් නැතත්, ඡන්දය දිනුවත් පරාජය වුවත් වතු ජනතාවගේ පානීය ජල ප්‍රශ්නයට විසඳුම් ලබා දෙන බව එක්සත් ජාතික පක්ෂ දඹුල්ල ආසන සංවිධායක හා මාතලේ දිස්ත්‍රික් එජාප අපෙක්ෂක ප්‍රියානි විජේරත්න මහතා සඳහන් කරනවා.

මාතලේ සෝමරත්න

මඩුගස්පිටිය රක්ෂිතයේ  ගින්නක්

බදුල්ල සොරණාතොට මඩුගස්පිටිය රක්ෂිතයේ  පෙරේදා  (08දා)  රාත්‍රියේ  හටගත් ගින්නක්  ඊයේ (09දා) උදැසන වනතෙක් පැතිර‍ගොස් ඇතැයි බදුල්ල පොලීසිය පවසයි. ප්‍රදේශවාසීන් විසින් ගින්න පාලනය කිරීමට පියවර ගෙන ඇති අතර,  ගින්නෙන් අක්කර 20 ක පමණ කැලෑබිමක් විනාශවී ඇත.

පාලිත ආරියවංශ

තරුණයකු දුම්රියට පැන දිවි නසා ගනියි

තඹුත්තේගම මුසල්පිටිය ප්‍රදේශයේදී 17 වියැති තරුණයෙකු දුම්රියට පැන පෙරේදා (08දා) රාත්‍රියේ සිය දිවිනසාගෙන ඇතැයි තඹුත්තේගම පොලීසිය පවසයි. පෞද්ගලික ආයතනයක සේවය කළ, තඹුත්තේගම 2 වන පියවර පදිංචි  හිරුණ දිල්ශාන් කෝශිකවර්ණ නමැති මෙම තරුණයා රාත්‍රී 8.30 ට පමණ කොළඹ සිට අනුරාධපුර බලා පැමිණි දුම්රියේ ගැටී අනතුරට ලක්වන්නට ඇතැයි තඹුත්තේගම පොලීසිය සැක පහළ කරයි. 

එප්පාවල තිසර සමල්