මත්තල ගුවන්තොටුපොළට වන අලි කඩා පනී

තම සුපුරුදු වාසස්ථාන සොයා පැමිණි වන අලින් කිහිපදෙනෙකු පසුගිය දින කිහිපය පුරාවට මත්තල ගුවන්තොටුපොළ වටා ඇති ආරක්‍ෂිත වැට කඩ දමා ගුවන් තොටුපොළ පරිශ්‍රයට ඇතුළුවී තිබේ . වන අලින් ඇතුළුවීම වැළැක්වීම සඳහා ගුවන්තොටුපොළ වටා ඇති වැට කඩා තිබී ඇති අතර,මෙම වන අලියා පලවා  හැරීමට හම්බන්තොට වනජීවී කාර්යාලයේ නිලධාරින් විසින් පසුගිය දින කිහිපය පුරාවටම මෙහෙයුම් දියත් කර තිබේ . හම්බන්තොට සිදුකරන සංවර්ධන කටයුතු හමුවේ වන අලින්ගේ වාසස්ථාන අහිමි වෙමින් පවතින අතර, වන අලින් හට වෙන්කර ඇති යෝජිත වන අලි කළමනාකරණ රක්ෂිතයද මේ වනවිට විවිධ සංවර්ධන කටයුතු සඳහා මෙන්ම , ජාවාරම්කරුවන්ගේ හා වන ඝාතකයන්ගේ ගොදුරක් වීම තුළ මෙම ගැටලුව මතුවී ඇති බව වනජීවී නිලධාරීහු පෙන්වා දෙති.

යෝජිත හම්බන්තොට වන අලි කළමනාකරණ රක්ෂිතය කඩිනමින් ප‍්‍රකාශයට පත්කර හම්බන්තොට අක‍්‍රමවත් සංවර්ධනය හේතුවෙන් අවතැන් වී ඇති අලි – ඇතුන් ගේ හා ඒ අවට ජනතාවගේ රැකවරණය තහවුරු කිරීමට හම්බන්තොට ස්වාභාවික සම්පත්, වනාන්තර හා අලි – ඇතුන්ගේ ගැවසුම් ප‍්‍රදේශ හුදෙකලා කිරීමට හා ඛණ්ඩනය කිරීමට හේතුවන අහිතකර සංවර්ධන සැලසුම් සකස්කිරීම නතර කළ යුතු බව ඔවුහු පවසති. ඉදිරි සංවර්ධන කටයුතු ක‍්‍රියාත්මක කිරීමට ප‍්‍රථමයෙන් හම්බන්තොට දැනට සිදුකර ඇති සංවර්ධන කටයුතුවලට අදාළව නිසි ඇගයීමක් සිදුකර හුදෙකලා වී ඇති හා ඛණ්ඩනය වී ඇති වනාන්තර හා ස්වාභාවික පරිසර පද්ධති ඒකාබද්ධ කිරීම තුළින් අලි – ඇතුන් ඇතුළුව සියලු ජෛව ප‍්‍රජාවගේ රැකවරණය හා ජල සුරක්ෂිතතාව තහවුරු කළ යුතු බව පරිසරවේදී සජීව චාමිකර මහතා කියා සිටී.