පියසේන ගමගේ හදිසි බලමණ්ඩල රැස්වීමක් කැඳවයි

හිටපු ජනාධිපති මහින්ද රාජපක්ෂ මහතාගේ පාර්ශ්වයෙන් එල්ල වන බාධා පිළිබඳව පාක්ෂිකයන් දැනුවත් කිරීම සඳහා එක්සත් ජනතා නිදහස් සන්ධානයේ ගාල්ල දිස්ත්‍රික්ක කණ්ඩායම් නායක, වෘත්තීය පුහුණු හා නිපුණතා අමාත්‍ය පියසේන ගම‍ගේ මහතා හදිසි බලමණ්ඩල රැස්වීමක් කැඳවා තිබේ. 
ඒ අනුව අනිද්දා (25දා) වැනිදා නෙළුව, තවලම, නාගොඩ සහ නියගම යන ප්‍රාදේශීය සභා බල ප්‍ර‘දේශවල පාක්ෂිකයන්ට ඒ සඳහා පැමිණෙන්නැයි ඒ මහතා දන්වා ඇත. 
මේ පිළිබඳව කළ විමසීමකදී පියසේන ගමගේ මහතා 'අද' ට සඳහන් කළේ, අනෙකුත් දිස්ත්‍රික්කවලට සාපේක්ෂව ගාල්ල දිස්ත්‍රික්කය තුළ මෛත්‍රී පාර්ශ්වයට මැතිවරණ ව්‍යාපාරයේ යෙදීම අතිශය දුෂ්කර වී ඇති බවයි. 
මේ පිළිබඳව ජනාධිපති මෛත්‍රීපාල සිරිසේන මහතා දැනුවත් කළ බවත්, පාක්ෂිකයන් කැඳවා මෙහි සත්‍ය තත්ත්වය දැනුම්දීමට තීරණය කළ බවත් හෙතෙම වැඩිදුරටත් සඳහන් කළේය.