නර්තන කණ්ඩායමක් මාවනැල්ලේදී අනතුරකට

මාවනැල්ල වලකඩයාව (කොළඹ මහනුවර ප‍්‍රධාන මාර්ගයේ) මංසන්ධියේදී බස් රථයක් සහ වෑන් රථයක් අද (23දා) පෙරවරුවේ එකිනෙක ගැටීමෙන් වෑන් රථයේ ගමන්ගත් හයදෙනෙකු තුවාල ලබා රෝහල්ගත කර ඇතැයි මාවනැල්ල පොලීසිය පවසයි.

මෙලෙස තුවාල ලබා රෝහල් ගත කර ඇත්තේ ප්‍රවීන සහ ජනප්‍රිය නර්තන ශිල්පියෙකු වන චන්දන වික්‍රමසිංහ මහතාගේ නර්තන කණ්ඩායමට අයත් තරුණියන් පස්දෙනෙකු සහ වෑන් රථයේ රියදුරාය.  

තුවාල ලැබූ සියලුදෙනා මාවනැල්ල මූලික රෝහලට ඇතුළත් කර ඇති අතර, එයින් බරපතළ තුවාල ලැබූ නර්තන ශිල්පිනියන් තිදෙනෙකු වැඩිදුර ප්‍රතිකාර සඳහා කෑගල්ල මහ රෝහලටත්, වෑන් රථයේ රියදුරා මහනුවර මහ රෝහලටත් මාරුකර යැවූ බව මාවනැල්ල පොලීසිය සඳහන් කරයි.

මහනුවර ප්‍රදේශයේ සංදර්ශනයක් සඳහා යමින් සිටි මෙම නර්තන කණ්ඩායමේ වෑන් රථයේ රියදුරාට නින්ද යාම හේතුවෙන් මෙම අනතුර සිදු වී ඇති බව පැවසෙන අතර, සිද්ධිය සම්බන්ධයෙන් මාවනැල්ල පොලීසිය වැඩිදුර පරීක්‍ෂණ පවත්වයි.

දමුණුපොළ චමින්ද ජයලත්