ජනාධිපති ලේකම් කාර්යාලයේ වාහන 172 ක් තවමත් අතුරුදන්

ජනාධිපති ලේකම් කාර්යාලයට අනුයුක්තව තිබූ රථවාහන අවභාවිතයට ලක්ව තිබෙන බවට පොලීසියට ලැබුණු පැමිණිල්ලකට අනුව සිදුකරන පරීක්ෂණවලට අනුව ජනාධිපති කාර්යාලය සතුව තිබූ වාහන 172 ක් අතුරුදන්ව ඇතැයි සොයාගෙන තිබේ. 
පොලිස්පතිවරයාට ලැබුණු පැමිණිල්ලකට අනුව අපරාධ පරීක්ෂණ දෙපාර්තමේන්තුවේ සහකාර පොලිස් අධිකාරිවරයෙකුට මේ පිළිබඳ සොයාබලන ලෙස පොලිස්පතිවරයා විසින් නියෝග කර ඇත. 
මේ අනුව සිදුකළ පරික්ෂණවලට අනුව ජනාධිපති කාර්යාලය සතුව වාහන 752 ක් තිබූ බවට සොයාගෙන ඇත.
මෙම ප්‍රමාණයෙන් වාහන 379 ක් විවිධ පුද්ගලයන් විසින් රැගෙන ගොස් පසුව භාර දී තිබෙන බවට සොයාගෙන තිබෙන අතර, තවත් වාහන 201 ක් ආරක්ෂක අංශ ප්‍රධානීන් සහ ජනාධිපති කාර්යාලයේ නිලධාරීන් සතුව තිබෙන බවටද හෙළි කරගෙන තිබේ. 
එහෙත් තවත් වාහන 172 ක් අතුරුදන්ව පවතින බව අනාවරණය කරගෙන ඇති අතර, ඉදිරි දිනවලදී එම වාහන භාරදීමට කටයුතු නොකළහොත් වාහන අත්අඩංගුවට ගැනීමට විශේෂ මෙහෙයුමක් දියත් කිරීමටත් අපරාධ පරීක්ෂණ දෙපාර්තමේන්තුව සැලසුම් කර ඇත.