ජනපති ජනහමුව විකාශය අත්හිටුවයි

රූපවාහිනී නාළිකා හතරක අද (05දා) රාත්‍රියේදී පැවැත්වීමට නියමිතව තිබූ 'ජනපති ජනහමුව' වැඩසටහන අත්හිටුවීමේ අතුරු තහනම් නියෝගයක් කඩුවෙල දිසා අධිකරණය විසින් අද (05දා) නිකුත් කරනු ලැබීය.

ස්වාධීන රූපවාහිනී සේවය, ජාතික රූපවාහිනිය, ස්වර්ණවාහිනිය හා දෙරණ නාලිකාව ඔස්සේ මෙම වැඩසටහන විකාශය කිරීමට නියමිතව තිබුණි.

අදාළ වැඩසටහනට විරෝධය දක්වමින් කඩුවෙල දිසා අධිකරණයට කරුණු දැක්වූ පොදු අපේක්ෂක මෛත්‍රීපාල සිරිසේන මහතාගේ නීතිඥයන් පෙන්වා දුන්නේ, ජනපතිවරණ ප්‍රචාරක කටයුතු ඊයේ මධ්‍යම රාත්‍රියෙන් පසුව අවසන් වන බවත්, එම වැඩසටහනේදී ඉදිරිපත්වන කරුණු සඳහා ප්‍රතිචාර දැක්වීමට පොදු අපේක්ෂක මෛත්‍රීපාල සිරිසේන මහතාට සමාන කාලයක් හිමිනොවන බවත්ය.

මෙම කරුණු දැක්වීම හමුවේ අදාළ මාධ්‍ය ආයතන හතරට 'ජනපති ජනහමු' වැඩසටහන විකාශය කිරීම අත්හිටුවීමට කඩුවෙල දිසා අධිකරණය නියෝග නිකුත් කළේය.