කාන්තාවක පැදවූ මෝටර් රථය අනතුරු පහක් කරයි

කාන්තාවක විසින් පදවන ලද මෝටර් රථයක් ඊයේ (04දා) මීරිගම, විජයරජදහන ප්‍රදේශයේ ස්ථාන තුනකදී වාහන පහක ගැටීමෙන් පුද්ගලයන් 07 දෙනෙකු තුවාල ලබා ඇතැයි මීරිගම පොලීසිය පවසයි.

තුවාලකරුවන් මීරිගම රෝහලට ඇතුළත් කිරීමෙන් අනතුරුව බරපතළ තත්ත්වයේ සිටි පුද්ගලයෙකු වතුපිටිවල මූලික රෝහලටත්, එතැනින් කොළඹ ජාතික රෝහලටත් මාරුකර යවා තිබේ.

අනතුරින් කුඩා ළමුන් තිදෙනෙකු, පිරිමි පුද්ගලයන් දෙදෙනෙකු හා කාන්තාවන් දෙදෙනෙකු තුවාල ලබා ඇති අතර, ඔවුන් අතර, මෝටර් රථය පැදවූ කාන්තාව හා ඇයගේ දරුවාද සිටින බව පොලීසිය පැවසීය.

අදාළ කාන්තාව විජය රජදහන ප්‍රදේශයේ නිවාස සංකීර්ණයේ සිට මෝටර් රථයෙන් පැමිණෙද්දී එම රථය මාර්ගයේ ධාවනය වූ මෝටර් රථයක හා යතුරුපැදි දෙකක ගැටී ඇත.

එම අනතුරින් පසු අදාළ මෝටර් රථය පස්යාල - මීරිගම මාර්ගයේ අධික වේගයෙන් ධාවනය කර ඇති අතර, එහිදී මාර්ගයේ නතර කර තිබූ ත්‍රිරෝද රථ දෙකක ගැටී අනතුරුව පොහොන්නරුව පන්සල පාරේ තිබූ අඹ ගසකද ගැටී ඇතැයි මූලික පොලිස් පරීක්ෂණවලදී අනාවරණය වී තිබේ.