2020 -2022 සෞඛ්‍ය ව්‍යාපෘති සඳහා යුරෝ මිලියන 20ක්
සෞඛ්‍ය හා දේශීය වෛද්‍ය සේවා, කාන්තා හා ළමා කටයුතු සහ සමාජ ආරක්ෂණ අමාත්‍ය පවිත්‍රා වන්නිආරච්ච් මහත්මිය හා ජීනිවා ගෝලීය අරමුදලේ ව්‍යාපෘති අධ්‍යක්ෂිකා ඉංජිනේරු පුබුදු ද සොයිසා මහත්මිය අතර හමුවක් පසුගියදා සෞඛ්‍ය අමාත්‍යාංශයේ දී සිදු විය.
මෙහිදි ශ්‍රී ලංකාවේ සෞඛ්‍ය සේවාවේ ගුණාත්මකභාවය ඉහළ නැංවිමට හා සෞඛ්‍ය දර්ශක ඉහළ නැංවිමට විවිධ ව්‍යාපෘති ක්‍රියාවට නංවමින් ගෝලීය අරමුදල දක්වන ලද දායකත්වයට සහ ගෝලීය අරමුදලේ ව්‍යාපෘති අධ්‍යක්ෂ ලෙස සහ රෝටරි සමාජයේ සාමාජිකාවක් ලෙස පුබුදු ද සොයිසා මහත්මිය විසින් සිදු කරනු ලබන මෙහෙය සෞඛ්‍ය අමාත්‍යතුමියගේ ඇගයීමට ලක් විය.
ගෝලීය අරමුදල මගින් ලංකාවේ ක්ෂය රෝගය, මැලේරියාව සහ ලිංගාශ්‍රිත රෝග පාලනය කිරීම සදහා 2003 වසරේ සිට වසර 18 ක පමණ කාලයක් පුරා රුපියල් බිලියන 18.3 ක මුදල් ආධාර අප රට වෙත මේ වනතෙක් ලබා දී ඇත.
මෙම ව්‍යාපෘතියේ 2019 - 2021 ව්‍යාපෘතිය මේ වනවිට ක්‍රියාත්මක වේ. සෞඛ්‍ය අමාත්‍යාංශය විසින් ඉහත රෝග පාලනය හා ලංකාවෙන් තුරන් කිරීම සදහා ගෙනයනු ලබන ව්‍යාපෘති සදහා සහයෝගය දැක්වීම මෙම ව්‍යාපෘතියෙන් සිදු කරනු ලබයි. 2025 වනවිට HIV AIDS රෝගය මෙරටින් තුරන් කිරීමට ද 2030 දි ක්ෂය රෝගය මෙරටින් තුරන් කිරීමට ද මෙම ව්‍යාපෘතිය මගින් මුදල් ආධාර සෞඛ්‍ය අමාත්‍යාංශය වෙත ලබාදෙනු ලබයි.
ගෝලීය අරමුදල මගින් ක්ෂය රෝගය පාලනය සහ රෝගීන් හදුනා ගැනීම සදහා Digital X-Ray යන්ත්‍ර, ජින් එක්ස්පර්ට් (Gene Expert) යන්ත්‍ර සහ ජංගම Digital X-Ray බස් රථයක් ඇතුලු උපකරණ රැසක් සහ ඖෂධ ලබා ගැනීම සදහා ආධාර ලබා දී ඇත. HIV AIDS රෝගය පාලනය අරමුණු කරගෙන ආසාදිතයින් හඳුනා ගැනීම, පුනරුත්ථාපනය සහ පරීක්ෂණ කටයුතු සදහා අවශ්‍ය උපකරණ, ඖෂධ ලබාගැනීම සදහා ද ආධාර ලබාදී ඇති අතර රාජ්‍ය නොවන සංවිධාන සමග එක්ව එම වැඩකටයුතු සාර්ථක කර ගැනීම සදහා ද මුදල් ආධාර ලබාදෙනු ලබයි.
මීට අමතරව ගෝලීය අරමුදල මගින් ජර්මන් රජයේ සහයෝගය ඇතිව යුරෝ මිලියන 20 ක මුදලක් 2020 – 2022 කාල පරිච්ඡේදය සදහා ලබාදීමට බලාපොරොත්තු වන බවත්, ඒ දිවයිනේ සියලුම රෝහල් සහ රසායනාගාර නවීන තාක්ෂණයට අනුකූලව මනා සම්බන්ධතාවයක් ඇති කිරිම සහ නවීන Digital X-Ray 10 ක් ලබාදීම සදහා වන බවත් ගෝලීය අරමුදලේ ව්‍යාපෘති අධ්‍යක්ෂිකා ඉංජිනේරු පුබුදු ද සොයිසා මහත්මිය මෙම හමුවේ දී අවධාරණය කළාය.
.
popular news
ඔබේ අදහස් එවන්න.
ඔබේ අදහස් සිංහලෙන්, ඉංග්රීසියෙන් හෝ සිංහල ශබ්ද ඉංග්රීසි අකුරෙන් ලියා එවන්න.
