චීන ගගනගාමීන් දෙදෙනා ටිඈන්ගොන්ග් 2 වෙතට

අභ්‍යවකාශයට ගිය චීන ගගනගාමීන් දෙදෙනා ටිඈන්ගොන්ග් 2 අභ්‍යවකාශ පර්යේෂණ මධ්‍යස්ථානයට පැමිණ ඇති බව විදෙස් වාර්තා පවසයි.

චීනයේ අභ්‍යවකාශ ශක්තිය හා හැකියාව වර්ධනය කිරීමේ අරමුණින් ඔවුන් රැගත් ෂෙන්සොවු-11 අභ්‍යවකාශ යානය පසුගිය සඳුදා උතුරුදිග චීනයෙන් උඩුගුවනට එසවුණු අතර, එය බීජිං වේලාවෙන් බදාදා අලුයම 3.24 ට අභ්‍යවකාශ පර්යේෂණ මධ්‍යස්ථානය වෙත පැමිණ තිබුණි.

මෙම යානයේ ජින්ග් හයිපෙන්ග් සහ චෙන් ඩොන්ග් නමැති ගගනගාමීන් දෙදෙනා ගමන් පැමිණි අතර, ඔවුන් දින 30ක කාලයක් පර්යේෂණවල නිරත වෙමින් අභවකාශයේ රැඳී සිටීමට නියමිතය.

ඒ අනුව, මොවුන් චීන අභ්‍යවකාශ මෙහෙයුම් ඉතිහාසයේ මේ දක්වා වැඩිම කාලකයක් අභ්‍යවකාශයේ රැඳී සිටින ගගනගාමීන් දෙදෙනා බවටද පත්වනු ඇත.

ඔවුන් මේ වනවිට රැඳි සිටින ටිඈන්ගොන්ග් 2 අභ්‍යවකාශ පර්යේෂණ මධ්‍යස්ථානය පෘථිවියේ සිට කිලෝමීටර් 393ක් (සැ.244ක්) ඉහළින් රැඳී තිබෙන අතර, ඔවුන් රැගත් අභ්‍යවකාශ යානය දුරස්ථ පාලන ආධාරයෙන් එම මධ්‍යස්ථානය සමග සම්බන්ධ කර ඇත.