දෘශ්‍යාබාධිත ක්‍රිකට් කණ්ඩායමට අදත් ජයක්

ඉන්දියාවේ පැවැත්වෙන විස්සයි20 දෘශ්‍යාබාධිත ක්‍රිකට් ලෝක කුසලාන තරගාවලියේ ශ්‍රී ලංකා කණ්ඩායම අද (1දා) ක්‍රීඩා කළ තරගයෙන්ද ලකුණු 130ක දැවැන්ත ජයග්‍රහණයක් වාර්තා කිරීමට සමත්වූයේය. තරගයේ මුලින්ම පන්දුවට පහරදුන් ශ්‍රී ලංකා කණ්ඩායම ලකුණු 281ක් රැස්කළේ කඩුලු දෙකක් වැයකරමිනි.

ලකුණු 282ක ජයග්‍රාහී ඉලක්කයක් හඹායාගිය බටහිර ඉන්දීය කොදෙව් කණ්ඩායමට නියමිත පන්දුවාර විස්ස තුළදි කඩුලු අටක් දැවී රැස්කළ හැකිවූයේ ලකුණු 151ක් පමණි.

ඊයේ පැවැති තරගයේදී ශතකයක් වාර්තා කළ ආරම්භක පිතිකරු සුරංග සම්පත් අද දිනයේදීද නොදැවී වේගවත් ශතකයක් රැස්කිරීමට සමත්වූයේය.