රිම් ඔෆ් ද පැසිෆික් - අභ්‍යාසය නාවික හමුදා මැරීන් සාමාජිකයෝ සාර්ථකව අවසන් කරති

ඇමෙරිකා එක්සත් ජනපද නාවික හමුදාව විසින් සංවිධානය කරනලද ‘Rim of the Pacific - 2018 (RIMPAC) නාවික අභ්‍යාසයට සහභාගි වීම සඳහා පසුගිය මැයි 21 වැනිදා දිවයිනෙන් පිටත්ව ගිය ලුතිනන් කමාන්ඩර් (මැරීන්) සනත් මහින්ද මහතා ඇතුළු නාවික හමුදා මැරීන් බළකා සාමාජිකයෝ සිය අභ්‍යාසය සාර්ථකව අවසන් කරමින් පසුගියදා දිවයිනට පැමිණියහ.

ඔස්ට්‍රේලියානු රාජකීය නාවික හමුදා මැරීන් බළකා සහ ඇමෙරිකා එක්සත් ජනපද නාවික හමුදා මැරීන් බළකා සාමාජිකයන් සමග එක්ව ආපදා සහන සැලසීම මෙන්ම භූ ජල තර්ණ අභ්‍යාස පිළිබඳ හැදෑරීම් සිදු කරන ලද ශ්‍රී ලංකා මැරීන් බළකා කණ්ඩායම රොකට්, අත් බෝම්බ, මි.මී.40 මෝටාර්,මි.මී. 60 මෝටාර් වෙඩි තැබීම් සහ ආර්.පී.ජී. වෙඩි තැබීම පිළිබඳ නව අත්දැකීමක් සහ පුහුණුවක් ලබා ගැනීමට එහිදී සමත් විය.

සමුද්‍රීය ආරක්‍ෂාව සහ ගුවන් ආරක්‍ෂක මෙහෙයුම් ආවරණය වන පරිදි සිදු කරන ලද ලොව විශාලතම ජාත්‍යන්තර නාවික අභ්‍යාසය වන මෙම අභ්‍යාසය ආපදා සහන, අධිභෞතික මෙහෙයුම්, මිසයිල ප්‍රහාර සහ බිම්බෝම්බ ඉවත් කිරීම සම්බන්ධ අභ්‍යාසවලින් සමන්විත වන අතර,විදේශීය මැරීන් බළකා සමගඅන්‍යෝන්‍ය අවබෝධය තවදුරටත් වර්ධනය කර ගැනීම සහ අන්තර්ජාතික මුහුදු කලාපයේ ආරක්‍ෂාව ස්ථාවරව පවත්වා ගැනීම ප්‍රධාන අරමුණු කර ගැනෙයි.

1971 දී ප්‍රථමවරට ආරම්භ කරන ලද මෙම අභ්‍යාසය මෙවර පවත්වන ලද්දේ 26 වැනි වරටය. එහිදී රටවල් 25ක් නියෝජනය කරමින් ක්‍ෂේත්‍ර බළකා නාවික පුද්ගලයන් 25,000ක් සහභාගිව සිටියහ.