දුම්රිය උමගක් තුළ වැහිලිහිණි කූඩු කැඩූ සැකකරු අත්අඩංගුවේ

ලංකාවේ දිගම දුම්රිය උමං මාර්ගය වන හැටන් සිංගිමලේ දුම්රිය උමග තුළ බැඳ තිබෙන වැහිලිහිණි කූඩු කඩා අලෙවි කිරීමට සූදානම් කර තිබියදී එම වැහිලිහිණි කූඩු තොගය සමග අත්අඩංගුවට ගැනීමට ඊයේ(30දා) හැකිවූ බව හැටන් පොලීසිය සඳහන් කරයි.

එම වැහිලිහිණි කූඩුවල මැලියම් විශේෂයක් සුප් වර්ගයක් සෑදීම යොදාගන්නා අතර, ඒ හෙයින් තරු පහේ හෝටල්වල මේ සඳහා අධික ඉල්ලුමක් පවතින බවත්, සැකකරු පොලීසියට පවසා ඇතැයි පොලීසිය පවසයි.

මෙම සැකකරු කාලයක් තිස්සේ මෙම උමග තුළ මෙම ක්‍රියාව සිදුකර ඇති බව පොලිස් පරීක්ෂණවලින් හෙළි වූ බව හැටන් පොලීසිය සඳහන් කරයි.

මේ සම්බන්ධයෙන් පොලීසියට ලද තොරතුරක් මත සැකකරුගේ නිවස පරීක්ෂා කිරීමේදී මෙම වැහිලිහිණි කූඩු තොගය ඉතා රහසිගතව සඟවා තිබියදී සොයාගැනීමට හැකිවූ බව පොලීසිය වැඩිදුරටත් සඳහන් කරයි.

වනජීවී ආඥා පනතට අනුව වැහිලිහිණි කූඩු කඩාදැමීම සපුරා තහනම් බවත් පොලීසිය සඳහන් කර සිටියි.

ඒ අනුව මෙම සැකකරු අද(31දා) හැටන් මහේස්ත්‍රාත් අධිකරණය වෙත ඉදිරිපත් කිරීමට නියමිත බවත් පොලීසිය පවසයි.සිදුවීම සම්බන්ධයෙන් හැටන් පොලීසිය වැඩිදුර විමර්ශන කටයුතු සිදුකරනු ලබයි.