චීන නාවික හමුදාවේ 716ක් සමගින් නෞකා 3ක් දිවයිනට

ආපදාවට පත් ජනතාවට සහන ලබාදීම සඳහා චීන නාවික හමුදාවට අයත් නෞකා 3 ක් ඊයේ (31දා) කොළඹ වරායට සේන්දු වීය. වෛද්‍ය කණ්ඩායම් පහක් (5) සහ ආපදා සහන කටයුතු සඳහා කුඩා යාත්‍රා 10 ක් දිවයින පුරා විපතට පත් ජනතාව උදෙසා සහන සැලසීමට ශ්‍රී ලංකා නාවික හමුදාව සමග එක්ව කටයුතු කිරීමට නියමිතය.

චීන නාවික හමුදාවේ ‘චෑන් චුන්’, ‘ජින් ශොව්’ සහ ‘චාඕ හු’ යන නෞකාවන් මෙසේ දිවයිනට පැමිණියේය. නිලධාරීන් 204කින් සමන්විතව සමස්ත චීන නාවික හමුදා සාමාජිකයන් 716ක් නෞකා තුනෙන් දිවයිනට පැමිණියහ.

නාවික හමුදාධිපති වයිස් අද්මිරාල් රවීන්ද්‍ර විජේගුණරත්න මහතාද ඊයේ සවස එම නෞකාවන්හි චාරිකාවක නිරත විය. එහිදී චීන රජය විසින් ආපදා සහන සඳහා මෙරටට රැගෙන එන ලද කුඩා යාත්‍රා සහ සහනාධාර විශාල ප්‍රමාණයක් නිල වශයෙන් නාවික හමුදාධිපතිවරයාට පිරිනැමීම සිදුවිය.