සෝමාලියාවේ අගනුවර කාර් බෝම්බයෙන් 76ක් මරු දකිති

සෝමාලියාවේ අගනුවර උදෑසන කාර්යබහුල වේලාවක පුපුරා ගිය වාහන බෝම්බයකින් පුද්ගලයින් 76 දෙනෙකු මිය ගොස් තිබේ.

මෙම පිපිරීම සිදුව ඇත්තේ මොගඩිෂු හි කාර්යබහුල මංසන්ධියක මුරපොලක වන අතර, 90කට වැඩි පිරිසක් තුවාල ලැබූහ.

බෝම්බ ප්‍රහාරයේ වගකීම මෙතෙක් කිසිදු කණ්ඩායමක් විසින් භාරගෙන නොමැති නමුත් අල්-ෂබාබ් සටන්කාමීන් බොහෝ විට එහි ප්‍රහාර එල්ල කර තිබේ.

ජනාධිපති මොහොමඩ් අබ්දුල්ලාහි ෆර්මාජෝ කියා සිටියේ සෝමාලියානු ජනතාව අධෛර්යමත් කිරීම එහි අරමුණ වුවත්, ජිහාඩ්වාදීන් හමුවේ කිසිවිටෙකත් රට නැවත ගොඩනැඟීම නතර නොකරන බවයි.

අල්කයිඩා සංවිධානය සමඟ මිත්‍ර වූ ඉස්ලාමීය සටන්කාමීන් පිරිසක් වන අල්-ෂබාබ් වසර 10 කට වැඩි කාලයක් එරට තුළ කැරැල්ලක් දියත් කරමින් සිටියි. 2011 දී අගනුවරින් ඔවුන් පළවා හැරුණත් තවමත් රටේ ප්‍රදේශ පාලනය කරයි.