නයිජීරියා පාසල් ගොඩනැගිල්ලක් කඩා වැටී සිසුන් රැසක් මරු දකිති

නයිජීරියාවේ, ලාගෝස් දූපතේ පාසල් ගොඩනැගිල්ලක් කඩා වැටීමෙන් පාසල් සිසුන් 8 දෙනෙකු ජීවිතක්ෂයට පත්ව තවත් විශාල පිරිසක් සුන්බුන් අතර සිරවී සිටින බව විදෙස් වාර්තා පවසයි.

ලාගෝස් දූපතේ, ඉටා ෆාජි නගරයේ මහල් තුනකින් යුතු ගොඩනැගිල්ලක උඩු මහලේ මෙම පාසල පවත්වා ඇති බව සඳහන් වෙයි. එම අවස්ථාවේදී එහි පාසල් සිසුන් 100කට වැඩි පිරිසක් සිටි බව මුදාගැනීමේ කණ්ඩායම් පවසයි.

එහිදී, සිසුන් 40කට ආසන්න පිරිසක් නිරුපද්‍රිතව බේරාගැනීමට හැකිවී ඇති අතර, මුදාගැනීමේ මෙහෙයුම් තවදුරටත් සිදුවන බව බලධාරීහු පවසති.

ඒ අනුව, මෙම සිද්ධියේ ජීවිතහානි වැඩිවිය හැකි බවද විශ්වාස කෙරෙන අතර, ගොඩනැගිල්ල කඩා වැටීමට හේතුව මෙතෙක් අනාවරණය කරගෙන නොමැත.