එක්සත් ජනපදය ජෝර්දානයට හා ඊජිප්තුවට සුනඛයන් යැවීම නවතයි

නොසැලකිලිමත්කම හේතුවෙන් සතුන් රැසක් මිය යාමෙන් පසු පුපුරණ ද්‍රව්‍ය සොයා ගන්නා සුනඛයන් ජෝර්දානයට සහ ඊජිප්තුවට යැවීම නවතා දමා ඇති බව එක්සත් ජනපදය පවසයි.

“ක්‍ෂේත්‍රයේ සුනඛයෙකු මිය යාම අතිශයින්ම කනගාටුදායක සිදුවීමක්” යැයි එක්සත් ජනපද රාජ්‍ය දෙපාර්තමේන්තු ප්‍රකාශකයෙක් පැවසීය.

මෑත වර්ෂවලදී ජෝර්දානය, ඊජිප්තුව සහ තවත් රටවල් 8කට යවන ලද සුනඛයන් 100කට වැඩි පිරිසක් රැකබලා ගැනීමේදී නොසැලකිලිමත්කම පිළිබඳ සිද්ධීන් එක්සත් ජනපද වාර්තාවක් සැප්තැම්බර් මාසයේදී ඉස්මතු කළේය.

ත්‍රස්ත විරෝධී වැඩසටහන්වල කොටසක් ලෙස එක්සත් ජනපදයේ පුහුණුවලත් සුනඛයන් ලබාදෙන ලදී.

එක්සත් ජනපදයේ මෙම ක්‍රියාව සම්බන්ධයෙන් ජෝර්දානය සහ ඊජිප්තුව මේ දක්වා කිසිදු ප්‍රසිද්ධ ප්‍රකාශයක් කර නැත.

එක්සත් ජනපදය සිය තාවකාලික තහනම සඳුදා නිවේදනය කළේය. එක්සත් ජනපද රාජ්‍ය දෙපාර්තමේන්තු නිලධාරියා කියා සිටියේ මෙම පියවර තවදුරටත් මරණ වැළැක්වීම සඳහා ගත්තක් බවයි.

ත්‍රස්තවාදයට එරෙහිව විදේශයන්හි සහ ඇමරිකානු ජීවිත බේරා ගැනීමේදී සුනඛයන් තීරණාත්මක කාර්යභාරයක් ඉටුකරන බවද ඔහු කීවේය.