ලයිබීරියාවේ ඉබෝලා මරණයක් වාර්තා වේ

ලයිබීරියාවේ නවතම ඉබෝලා මරණයක් වාර්තා වීමත් සමග එම පළාතේ නිරෝධායන ක්‍රියාවලියක් සිදුව තිබේ.

මීට සති හතකට පෙර ලයිබීරියාවෙන් සම්පූර්ණයෙන්ම ඉබෝලා වසංගතය පිටුදැකීමට කටයුතු කළ බව පැවසීමෙන් පසු එරටින් ජීවිත හානියක් වාර්තා වූ ප්‍රථම අවස්ථාව මෙය ලෙස සැලකෙයි.

එරට නියෝජ්‍ය සෞඛ්‍ය අමාත්‍යවරයාද මෙය තහවුරු කර ඇති අතර 17 හැවිරිදි තරුණයෙකු වෛරසය හේතුවෙන් පසුගිය ජුනි 28 වැනිදා ජීවිතක්ෂයට පත්වූ බව පවසා තිබේ.

කෙසේ වෙතත්, මෙසේ පාලනයට නතු කළ වෛරසය යළි පණ ලැබුවේ කෙසේද යන්න පිළිබඳව ලයිබීරියාව මේ වනවිට තොරතුරු සොයමින් පවතී.