සිලෝන් මෝටර් ෂෝ 2017 අද ඇරඹේ

මෙරට විශාලතම රථ වාහන ප්‍රදර්ශනයක් ලෙස සැලකෙන ‘සිලෝන් මෝටර් ෂෝ 2017‘ ප්‍රදර්ශනය ශ්‍රී ලංකා ඉන්ෂුවරන්ස් මෝටර් ප්ලස් අනුග්‍රහයෙන් අද (27දා) ආරම්භ වීමට නියමිතය.

අද ප.ව. 5.00 ට ආරම්භ වන ප්‍රදර්ශනය ජනවාරි 29 වැනිදා දක්වා පැවැත්වෙන අතර 28 සහ 29 දෙදින තුළ, එනම් සති අන්තයේ පෙ.ව. 9.30 සිට රාත්‍රී 11.00 දක්වා ප්‍රදර්ශනය විවෘතව තැබෙන බව සංවිධායකයෝ පවසති. ලොව ප්‍රමුඛ පෙළේ රථවාහන සන්නාම යටතේ අලුතින්ම වෙළෙඳ පොළට පැමිණෙන, නවීන තාක්ෂණයන්ගෙන් පන්නරය ලැබූ කාර්, SUV රථ, යතුරුපැදි, වෑන් සහ අනෙකුත් වාණිජ රථවාහන වර්ග මෙන්ම අතීතයේ ප්‍රෞඪ නිර්මාණ ලෙස සදාකාලික වටිනාකමක් හිමිකරගෙන ඇති ඉපැරණි රථවාහන පෙළක්ද මෙහිදී ප්‍රදර්ශනය කෙරෙන බව සඳහන් වේ.

ශ්‍රී ලංකා රථවාහන අලෙවිකරුවන්ගේ සංගමය සහ ලංකා පැරණි මෝටර් රථ සමාජය එක්වී, ශ්‍රී ලංකා ඉන්ෂුවරන්ස් මෝටර් ප්ලස් හි දායකත්වය ඇතිව මෙම ප්‍රදර්ශනය සංවිධානය කරයි. රථවාහන ක්ෂේත්‍රයේ විවිධ අංශ රැසක් සම්බන්ධ කරගෙන වාර්ෂිකව පැවැත්වෙන ප්‍රදර්ශනය නැරඹීම සඳහා මෙවරත් විශාල පිරිසක් පැමිණෙනු ඇති බව සංවිධායකයෝ පවසති.

ශ්‍රී ලංකා රථවාහන අලෙවිකරුවන්ගේ සංගමය 1919 වසරේ සිට ලංකා වාණිජ මණ්ඩලයට අනුබද්ධ සංවිධානයක් ලෙස පවතින අතර, ප්‍රමුඛ පෙළේ ජාත්‍යන්තර රථ වාහන සන්නාම නියෝජනය කරන සමාගම්වලින් එම සංවිධානය සමන්විත වේ. 'සිලෝන් මෝටර් ෂෝ 2017' ප්‍රදර්ශනයේ ප්‍රධාන අනුග්‍රාහක ලෙස ශ්‍රී ලංකා ඉන්ෂුවරන්ස් මෝටර් ප්ලස් කටයුතු කරන අතර, නිල මුද්‍රිත මාධ්‍ය ලෙස විජය පුවත්පත් සමාගම කටයුතු කරයි.