ශ්‍රී ලංකා ගැමා සෙන්ටර් මෙහෙයුම් ඇරඹීමට සූදානම්
මෙරට සමාජ, ආර්ථික දියුණුවෙහිලා යහපත් න්‍යෂ්ටික තාක්ෂණය යොදාගැනීම උදෙසා බියගම ආයෝජන කලාපයෙහි ස්ථාපනය කරනු ලැබූ ශ්‍රී ලංකාවේ ප්‍රථම බහුකාර්ය ගැමා ප්‍රවිකිරණ යන්ත්‍රාගාරය සිය මෙහෙයුම් කටයුතු ආරම්භ කිරීමට සූදානම් වෙයි.
නව අධි තාක්ෂණය භාවිතයෙන් නවෝත්පාදන ආර්ථිකයක් කරා පිය නැඟීමට අඩිතාලම සකසමින් ඉදිකළ ‘ශ්‍රී ලංකා ගැමා සෙන්ටර්’ තාක්ෂණ හා පර්යේෂණ අමාත්‍ය පාඨලී චම්පික රණවක මහතාගේ ආරාධනයෙන් ආර්ථික සංවර්ධන අමාත්‍ය බැසිල් රාජපක්ෂ මහතා අතින් 17 වැනි සඳුදා විවෘත කිරීමට නියමිතය.
ගැමා කිරණ යොදාගනිමින් වෛද්‍ය උපකරණ ජීවාණුහරණය, කුළුබඩු වැනි ආහාර ද්‍රව්‍යවල ක්ෂුද්‍රජීවීන් විනාශ කිරීම, ආහාර කල් තබාගැනීම හා නව කාර්මික අමුද්‍රව්‍ය නිෂ්පාදනය කිරීම සිදු කෙරෙන අතර, මෙම යන්ත්‍රාගාරය විවෘත කිරීමත් සමඟ විශේෂ වාසි රැසක් හිමිවන බව අමාත්‍යාංශය පවසයි. ගැමා ප්‍රවිකිරණ තාක්ෂණය අත්‍යාවශ්‍ය වන කර්මාන්ත රට තුළ බිහිවීම, මේ වනවිට ජීවානුහරණය නොකර අපනයනය කරන ද්‍රව්‍ය ජීවානුහරණය කර අපනයනය කිරීම මගින් වැඩි වටිනාකමක් එක් කිරීම, දේශීය වෙළෙඳ පොළ සඳහා හොඳ ස්ථාවරතාවයක් ලබාගත හැකිවීම (කුළුබඩු හා මුහුදු ආහාර වැනි), දැනට වෛද්‍ය ක්ෂේත්‍රය තුළ භාවිතවන උපකරණවල ගුණාත්මකභාවය වැඩි දියුණු කිරීම, ජීවාණුහරණය සඳහා භාවිත කරන හානිකර රසායන ද්‍රව්‍ය භාවිතය කර්මාන්ත ක්ෂේත්‍රයෙන් තුරන් කිරීම, නව කාර්මික අමුද්‍රව්‍ය නිපදවීම (විකිරණ යොදාගෙන ස්වාභාවික රබර් වල්කනයිස් කිරීම වැනි) හා කුඩා හා මධ්‍ය පරිමාණ ව්‍යවසායකයන් හට ගැමා ප්‍රවිකිරණ තාක්ෂණය ආශ්‍රිත කර්මාන්ත ඇරඹීමට දිරිදීම ඒ අතර ප්‍රධාන වන බවද අමාත්‍යාංශය පෙන්වා දෙයි.
.gif)
.gif)
popular news
ඔබේ අදහස් එවන්න.
ඔබේ අදහස් සිංහලෙන්, ඉංග්රීසියෙන් හෝ සිංහල ශබ්ද ඉංග්රීසි අකුරෙන් ලියා එවන්න.
