වසරක් භාවිත කළ විද්‍යුත් මෝටර් රථ බදුත් අඩුවෙයි

බෑන්ඩ් නිව් විද්‍යුත් මෝටර් රථ සඳහා පමණක් ලබාදීමට මෙවර අයවැයෙන් යෝජනා කෙරුණු බදු සහනය, වසර 01ක් පමණක් භාවිත කළ රිකන්ඩිෂන් විද්‍යුත් මෝටර් රථ සඳහාද ලබාදීමට හැකිවන ලෙස එම යෝජනාවේ සංශෝධනයක් සිදුවන බව මුදල් අමාත්‍යාංශ ආරංචි මාර්ග පවසයි.

2018 අයවැය යෝජනා අනුව විද්‍යුත් මෝටර් රථ සඳහා පනවා තිබූ ආනයන බදු රු.ලක්ෂ 10කන් පමණ අඩුවනු ඇති බව මුදල් අමාත්‍යවරයා සිය අයවැය කතාවේදී පවසා සිටියේය.

කෙසේ වෙතත්, භාවිත කළ වාහන මෙරටට ආනයනය කරන වාහන ආනයනකරුවන් බොහෝ දෙනෙකු මෙය අසාධාරණ යෝජනාවක් බව පවසා සිටි අතර, එවැනි යෝජනාවක් මේ අවස්ථාවේ ඵලදායී නොවන බවද ඔවුන්ගේ තර්කය විය.

ඒ අනුව, මෙම තත්ත්වයන් සලකා බලමින් වසර 01ක් පමණක් භාවිත කළ විද්‍යුත් මෝටර් රථ සඳහාද එම බදු සහනය ලබාදෙමින් අදාළ සංශෝධනය කිරීමට මුදල් අමාත්‍යාංශය තීරණය කර ඇති බව දැනගන්නට ලැබේ.

මුදල් අමාත්‍යාංශයේ මෙම තීරණය සම්බන්ධයෙන් භාවිත කළ වාහන මෙරටට ගෙන්වන වාහන ආනයනකරුවන්ගේ ප්‍රසාදය හිමිවී ඇත. ඒ අනුව, ලබන වසරේදී බ්‍රෑන්ඩ් නිව් ලීෆ් රථද මෙරටට ගෙන්වීමට ඒ.එම්.ඩබ්. සමාගම තීරණය කර ඇති බව ප්‍රකාශ කරන නිසා ඉදිරියේදී පාරිභෝගිකයන්ට හරිත ඉන්ධන යොදා ගැනෙන වාහන සඳහා නැඹුරු වීමට වැඩි ඉඩප්‍රස්ථා උදාවන බව ද ආර්ථික විශ්ලේෂකයෝ පෙන්වා දෙති.