ශ්‍රී ලංකා මානව හිමිකම් කේන්ද්‍රයෙන් පොලීසියට ඉල්ලිමක්

ඇඳිරි නීති බලපත් නිකුත් කිරීමේදී  විධිමත් ක්‍රමවේදයක් අනුගමනය කරන්නැයි ශ්‍රී ලංකා මානව හිමිකම් කේන්ද්‍රය අද (28) නිවේදනයක් නිකුත් කරමින් පොලීසියෙන් ඉල්ලා සිටියි.

වැඩබලන පොලිස්පතිවරයා වෙත ලිපියක් යොමු කරමින් ශ්‍රී ලංකා මානව හිමිකම් කේන්ද්‍රයේ  විධායක අධ්‍යක්ෂිකා සුරංගි ආරියවංශ මහත්මිය මෙම නිවේදනය නිකුත් කර තිබේ.

ඇය සඳහන් කරන්නේ මහජන ආරක්ෂාව සඳහා ඇඳිරිනීතිය පනවා ඇති අවස්ථාවලදී පවා විශාල වශයෙන් පිරිස් මහා මාර්ගවල ගමන් කරනු දක්නට ලැබෙන බවයි.

මේ අතරින් බහුතරයක් වාහනවල  අත්‍යවශ්‍ය සේවා යන ලේබලය දක්නට ලැබෙන බවත්, ඇතැම් වාහන වල අත්‍යවශ්‍ය සේවා සපයන ආයතනවල නාම පුවරු දක්නට ඇති බවත් ඇය කියා සිටියි.

මෙම බොහෝ වාහන ඇඳිරි නීති අවසර පත් සහිතව ධාවනය වන බව පෙනී යන බවත් එහි නිගමනය වන්නේ මේ අතරින් ඇතැම්  පිරිස් කෙසේ හෝ කුමන මාර්ගයකින් හෝ අත්‍යවශ්‍ය සේවා බව පෙන්වමින් ඇදිරි නීති අවසරපත් ලබාගෙන ඇති බව යැයි  ශ්‍රී ලංකා මානව හිමිකම් කේන්ද්‍රය පෙන්වා දෙයි. 

සමාජ දුරස්ථකරණය මෙම වසංගත තත්ත්වය මැඩලීමට ඇති හොඳම පියවර වන අතර ඒ සඳහා හැකිතරම් අවකාශ සලසා දෙනු වෙනුවට මෙලෙස විශාල වශයෙන් ඇඳිරි නිතී බලපත් සහ අවසරපත්ලබාදීම ඉතා අවධානම්කාරී තත්ත්වයක් බව ආරියවංශ මහත්මිය කියයි.

මේ සඳහා විධිමත් වැඩපිළිවෙළක් නොමැති වුවහොත්  නුදුරේදීම කොරෝනා වසංගතය ව්‍යාප්ත වීම නිසා අත්‍යවශ්‍ය සේවා පවා අත්හිටුවීමට  සිදුවනු ඇතැයි ඇය පෙන්වා දෙයි.

මේ නිසා එවැනි තත්ත්වයකට රට පත්වීම වළක්වාගැනීම සඳහා කඩිනමින් ක්‍රියාත්මක විය යුතුව ඇති බව ඇය සඳහන් කරන්නීය.

මේ නිසා මේ පිළිබඳ සොයා බලා ඇඳිරි නීති අවසරපත් නිකුත් කිරීම සඳහා මීට වඩා විධිමත් ක්‍රමවේදයක් අනුගමනය කිරීම සුදුසු බව යෝජනා කරමින් ශ්‍රී ලංකා මානව හිමිකම් කේන්ද්‍රය වැඩ බලන  පොලිස්පතිවරයා ගෙන් ලිඛිත ඉල්ලීමක් කර තිබේ.