ව්‍යාජ වීසා බලපත්‍රයකින් ප්‍රංශයට පැන යාමට තැත් කළ තරුණියක් අත්අඩංගුවට

කූඨ ලෙස සකස් කළ ප්‍රංශ නේවාසික වීසා බලපත්‍රයක් උපයෝගී කර ගනිමින් කටාර් රාජ්‍ය හරහා ප්‍රංශය වෙත පැන යාමට තැත් කළ ශ්‍රී ලාංකික තරුණියක් අද දින අලුයම කටුනායක ගුවන් තොටුපළ ආගමන විගමන දෙපාර්තමේන්තුවේ දේශසීමා ආවේක්ෂණ ඒකකයේ නිලධාරීන් පිරිසක් විසින් අත් අඩංගුවට ගෙන තිබේ .

ඇය වව්නියාව ප්‍රදේශයේ පදිංචි 21 හැවිරිදි ද්‍රවිඩ ජාතික තරුණියකි .

ඇය අද දින අලුයම 3.15 ට කටාර් රාජ්‍යයේ දෝහා වෙත පිටත්ව යෑමට නියමිතව තිබූ කටාර් ගුවන් සේවයේ කිව්.ආර්.- 669 දරන ගුවන් යානයට පිවිසීම සදහා කටුනායක ගුවන් තොටුපළ වෙත පැමිණ සිටියාය .

එහිදී ප්‍රවේශ පත්‍ර ලබා ගැනීමේ කවුළුව වෙත පැමිණි ඇය ඉදිරිපත් කළ ප්‍රංශ නේවාසික වීසා බලපත්‍රය පිළිබඳව සැක සිතූ කටාර් ගුවන් සේවා නිලධාරීන් එම ලියකියවිලි ඇය ද සමග වැඩිදුර විමර්ශන කටයුතු සදහා කටුනායක ගුවන් තොටුපළ ආගමන විගමන දෙපාර්තමේන්තුවේ දේශසීමා ආවේක්ෂණ ඒකකයේ නිලධාරීන් වෙත භාර දීමට පියවර ගෙන තිබුණි .

එහිදී එම නිලධාරීන් මෙම තරුණිය ඉදිරිපත් කළ ලියකියවිලි සියල්ල තාක්ෂණික පරීක්ෂාවන්ට ලක් කරන අතරතුර ඇයගෙන් ප්‍රශ්න කිරීම් ද සිදු කර තිබෙන අතර , ඇය ඒවාට අවශ්‍ය නිසි පිළිතුරු ලබා දී නොමැත .

එහිදී ඇය සතු ප්‍රංශ නේවාසික වීසා බලපත්‍රය ව්‍යාජ තොරතුරු ඇතුළත් කර කූඨ ලෙස සකස් කර ඇති බවට සනාථ වී තිබේ .

ඉන්පසුව මෙම තරුණිය ආගමන විගමන දෙපාර්තමේන්තු නිලධාරීන් විසින් අත්අඩංගුවට ගෙන වැඩිදුර විමර්ශන කටයුතු සදහා කටුනායක ගුවන් තොටුපළ අපරාධ පරීක්ෂණ දෙපාර්තමේන්තු නිලධාරීන් වෙත භාර දී තිබේ .