යාපනයේ ගම් දෙකකට සංචරණ සිමා

පෑලියගොඩ ‍මාලු තොග වෙළඳ සංකීර්ණයට ගිය යාපනයේ මාලු ව්‍යාපාරිකයින් දෙදෙනෙකුට කොවිඩ් 19 වෛරසය වැළඳී ඇති බවට තහවුරු වී ඇතැයි යාපනය මහජන සෞඛ්‍ය පරික්ෂක කාර්යාලය පවසයි.

යාපනය ගුරුනගර් සහ පාසෙයිඌර් යන ගම්මානවල පදිංචි අදාල මාලු ව්‍යාපාරිකයින් දෙදෙනො පෑලියගොඩ මාලු තොග වෙළඳ සංකීර්ණයට ගොස් ඇති බවට අනාවරනය වීමෙන් පසුව ඔවුන් දෙදෙනාගෙන් සිදුකරන ලද පී.සී.ආර්. පරික්ෂණයකදී ඊයේ (27) දින වෛරසය ආසාදනය වී ඇති බවට තහවුරු වී ඇත.

ඒ අනුව ක්‍රියාත්මක වූ පොලීසිය, සෞඛ්‍ය නිලධාරීන් හා යුදහමුදාව එක්ව අදාල ගම්මානයන්ට පිවිසෙන ප්‍රධාන මාර්ග අවහිර කරමින් සීමා පැනවීමට පියවර ගනු ලැබීය.

එමෙන්ම අදාල ගම්මානයන්හි කොරෝනා  ආසාදිතයින් ඇසුරු කල පුද්ගලයින් හඳුනාගන්නා තුරු ගම් දෙක සම්පූර්ණයෙන්ම වසා දැමීමට පියවර ගන්නා ලෙසටද යාපනයේ සෞඛ්‍ය බලධාරීන් විසින් සෞඛ්‍ය අමාත්‍යංශයට දැනුම් දී ඇති අතර මේ වන විට අදාල ගම්මානයන්හි කොරෝනා  ආසාදිතයින් ඇසුරු කල පුද්ගලයින් හඳුනාගනිමින් නිරෝධායන කටයුතු හා පී.සී.ආර්. පරික්ෂණ වෙතට යොමු කරවීම සිදු කරන බවටද යාපනය මහජන සෞඛ්‍ය පරික්ෂක කාර්යාලය වැඩිදුරටත් පැවසීය.