යාපනයේ ක්‍රිඩාංගනයක් අසල කොටි බෝම්බ ගබඩාවක්

යාපනය අම්පන් ප්‍රදේශයේ පිහිටි ක්‍රීඩාංගණයක් ආසන්නයේ පිහිටි කැලෑවක වලදමා තිබූ කොටි සංවිධානයට අයත් බෝම්බ රැසක් යාපනය පොලිස් විශේෂ කාර්ය බලකා කඳවුරේ නිලධාරීන් විසින් ඊයේ (22) සවස ගොඩ ගෙන ඇත.

පේදුරුතුඩුව නාවික හමුදා කඳවුරට ලැබුණු බුද්ධි තොරතුරකට අනුව එහි නිලධාරීන් විසින් ඒ බව යාපනය පොලිස් විශේෂ කාර්ය බලකා කඳවුරට දැනුම් දීමෙන් පසුව පොලිස් විශේෂ කාර්ය බලකා නිලධාරීන් විසින් අම්පන් සිවනොලික් ක්‍රීඩාංගණය ආසන්නයේ පිහිටි කැලෑවේ වලදමා තිබූ ස්ථානයන් පරික්ෂා කිරීමේදී අදාල කොටි බෝම්බ තොගය හමු වී ඇත.

එහදී වලදමා තිබියදී මිලිමීටර් 81 වර්ගයේ මෝටාර් උණ්ඩ 47 ක් සහ පකිස්තානයේ නිෂ්පාදිත යුද ටැංකි විනාශ කල හැකි කිලෝ 13 ක් බරැති විශාල ප්‍රමාණයේ  අධිබලැති පීඩන බෝම්බ  4ක් තිබී ගොඩ ගැනීමට පොලිස් විශේෂ කාර්ය බලකා නිලධාරීන් සමත්ව ඇත.

යුද සමයේදි අදාළ බෝම්බ තොගය කොටි සාමාජිකයින් විසින් මෙම ස්ථානයේ වලක් කපා ගබඩා කොට ඇති බවට පොලිස් විශේෂ කාර්ය බලකා සෙබළුන් සැක පල කර සිටි අතර ගොඩ ගත් බෝම්බ තොගය අධිකරණ නියෝගයකින් විනාශ කිරීමටද පියවර ගෙන ඇති බවට පොලිස් විශේෂ කාර්ය බලකා සෙබළුන් වැඩි දුරටත් කියා සිටියහ.