මහරගම නගර සභාවේ සේවකයෝ රාජකාරිවලින් ඉවත් වෙති

මහරගම නගර සභාවේ සභාපති ටිරාජ් පියරත්න මහතා සේවකයන් සිවුදෙනෙකුට පහරදීමේ සිද්ධියකට විරෝධය පළ කරමින් මහරගම නගර සභාවේ සියලුම සේවකයන් සිය රාජකාරි කටයුතුවලින් ඉවත්ව ඇති බව වාර්තා වේ.

පහරකෑමට ලක්වූ අදාළ සේවකයන් සිවුදෙනා ඊයේ (06දා) රාත්‍රී රාජකාරි වේලාවේ අවන්හලක මත්පැන් පානය කරන බවට සභාපතිවරයාට තොරතුරක් ලැබී ඇති අතර, ඔවුන් නගර සභාව වෙත කැඳවා ඔවුන්ට පහර දී ඇති බව නගර සභා සේවකයෝ පවසති.

පහරකෑමට ලක්වූ එම සේවකයන් ප්‍රතිකාර සඳහා හෝමාගම රෝහලට ඇතුළත් කර ඇති බවද සඳහන් වේ.

කෙසේ වෙතත් තමා අදාළ සේවකයන් සිවුදෙනාට තරයේ අවවාද කළ නමුත්, පහරදීමක් සිදු නොකළ බව මහරගම නගර සභාවේ සභාපති ටිරාජ් පියරත්න මහතා පවසයි.