මහර බන්ධනාගාරයෙන් පැන යාමට තැත් කල සැකකරුවකු මරුට

රාගම පොලිස් වසමේ පිහිටි මහර බන්ධනාගාරයේ "ඕ" වාට්ටුවේ රදවා සිටි සැකකරුවන් 8 දෙනකු අද (  03)  දා අලුයම    3.10 ට පමණ    බන්ධනාගාරයෙන් පැන යාම සදහා බන්ධනාගාර තාප්පය මතට නැගීමට උත්සාහ කිරිමේදි එක් පුද්ගලයකු තාප්පයෙන් වැටී මරණයට පත්විය.

සැකකරුවන් පැන යාමට උත්සාහ කිරීමේදී රාජකාරියේ යෙදී සිටි බන්ධනාගාර නිලධාරීන් ඉහලට වෙඩි තබා තිබේ.

මෙලෙස මිය ගොස් ඇත්තේ අංක 278ඉහල කරගහමූණ, කඩවත පදිංචි ඉසුරු කාවින්ද තිසේරා නැමති පුද්ගලයෙකි.

මත්ද්‍රව්‍ය භාවිතා  කිරීම හා  සොරකම් සම්බන්ධ වැරදි සදහා  කඩවත පොලීසිය අත්අඩංගුවට සැකකරු රක්ෂිත බන්ධනාගාර ගත කර තිබී ඇත.

පැන යාමට තැත්කල  සැකකරුවන් 07 දෙනෙකු  බන්ධනාගාරය තුලදිම මෙල්ල කර  බන්ධනාගාර නිලධාරීන්ගේ පාලනයට ගෙන ඇත.

සැකකරුවන් පාලනය කිරිම සදහා ක්‍රියා කිරිමේදි බන්ධනාගාර නිලධාරින් දෙදෙනකු සුළු තුවාල ලබා ප්‍රතිකාර සදහා රාගම මහ රෝහලට ඇතුලත්ව ඇත.

සිද්ධිය සම්බන්ධයෙන් පොලිස් කණ්ඩායම් කිහිපයක් හා බන්ධනාගාර දෙපාර්තමේන්තුව විසින් පරීක්ෂණ සිදු කරයි.

ජා-ඇල ප්‍රසංග පෙරේරා