මන්ත්‍රීවරු හුළු අතු පත්තු කරන් පළාත් සභා යති

හත්වැනි දකුණු පළාත් සභාවේ අවසාන රැස්වීම අද (08) පැවැති අතර ඒකාබද්ධ විපක්ෂය නියෝජනය කරන  මන්ත්‍රීවරු කිහිපදෙනෙකු රැස්වීමට පැමිණියේ හුළු අත්තක් පත්තු කරගෙනය.

කලේගාන පිහිටි පළාත් සභා ගොඩනැගිල්ලේ දී සභාපති කේ.ඒ.සෝමවංශ මහතාගේ ප්‍රධානත්වයෙන් මෙම රැස්වීම පැවැත්විණි.

මේ දිනවල සිදු කරනු ලබන විදුලි කප්පාදුවට විරෝධය පළ කරමින් හුළු අත්තක් පත්තු කරගෙන පැමිණි ඒකාබද්ධ විපක්ෂයේ මන්ත්‍රීවරු, රජයේ නොහැකියාව නිසා විදුලිය කප්පාදු කරන බවත් මේ නිසා ජනතාව දැඩි අපහසුවට පත්ව සිටින බවත් පැවසුහ.

ප්‍රධාන මාර්ගයේ සිට හුළු අත්තක් දල්වාගෙන පැමිණියත් ගේට්ටුවේ සිටි පොලිස් නිලධාරීන් විසින් සභා පරිශ්‍රයට ඇතුළුවීම වැළක්වීමට පියවර ගත්තේය.

පසුව එම මන්ත්‍රීවරු විරෝධතා පුවරු ප්‍රදර්ශනය කරමින්, සටන් පාඨ කියමින් සභාවට පැමිණෙන ලදී.

හිනිදුම - රවීන්ද්‍ර ශ්‍රිලාල්