බලන්ගොඩ නගරාධිපති යළි සේවයේ පිහිටුවයි

තනතුරෙන් ඉවත්කළ බළන්ගොඩ නගර සභාවේ සභාපතිවරයා යළි එම තනතුරේ පිහිටුවන ලෙස සබරගමු පළාත් ආණ්ඩුකාර ටිකිරි කොබ්බෑකඩුව මහතාට නියෝග කළ රත්නපුර අංක එක මහාධිකරණ විනිසුරු ලංකා ජයරත්න මහත්මිය නගර සභාපතිවරයා තනතුරින් ඉවත් කිරිමට නිකුත් කළ ගැසට් නිවේදනය නඩු කටයුතු අවසන් වනතෙක් තහනම් කරන ලෙස අද (03දා) නියම කළේය.

බළන්ගොඩ නගර සභාවේ සභාපති ලෙස කටයුතු කළ සේවය අත්හිටවු  චමික ජයමිණී විමලසේන මහතා විසින් සබරගමුව පළාත් ආණ්ඩුකාර ටිකිරි කොබ්බෑකඩුව, බළන්ගොඩ නගර සභාවේ උපසභාපති එම්.ටී.එම්.රූමි, බළන්ගොඩ නගර සභාව, විශ‍්‍රාමලත් මහාධිකරණ විනිසුරු හේරත් මුදියන්සේලාගේ රෝහණ අනුර කුමාර සහ සබරගමු පළාත් සභාවේ පළාත්පාලන කොමසාරිස්වරයා වගඋත්තරකරුවන් කරමින් ඉදිරිපත් කළ පෙත්තමක් විභාගයට ගත් අවස්ථාවේ මෙම තහනම නිකුත් කරනු ලැබීය.

නීතීඥ නෙවිල් කරුනාරත්න මහතා මගින් පෙත්සම්කරු මෙම පෙත්සම ඉදිරිපත් කර තිබුණි.

පෙත්සම්කාර චමික ජයමිණී විමලසේන මහතා තමන් 2018 වර්ෂයේ පැවති පළාත් පාලන මැතිවරණයෙන් බළන්ගොඩ නගර සභාවට කුමාරගම කොට්ඨාසයෙන් සභිකයෙකු ලෙස එක්සත් ජාතික පක්‍ෂයෙන් තේරීපත්වු බව සඳහන් කර ඇත.

පසුව තමන් බළන්ගොඩ නගර සභාවේ සභාපති ලෙස පත්වූ බවද පෙත්සම්කරු සිය පෙත්සමෙන් සඳහන් කර තිබුණි. පත්වු දින සිට සිය තනතුරේ රාජකාරී නීත්‍යානුකූලව කරගෙන යද්දී 2021 ජනවාරි 15 දින නිකුත් කරන ලද අංක 2210/50 දරණ ගැසට් පත‍්‍රයෙන් තමන්ට එරෙහිව මාස තුනක් ඇතුළත පරීක්‍ෂණයක් කරන ලෙස හතරවන වගඋත්තරකරුට නියෝග කරමින් පළමුවන වගඋත්තරකරු විසින් ඔහුට ලැබී ඇති බලතල අනුව තමන්ගේ සභාපතිධූරය දැරීම තාවකාලිකව අත්හිටුවා ඇතිබවද සඳහන් කර ඇත.

එය තමන්ගෙන් කරුණු විමසිමකින් තොරව කිසිදු සාධාරණ හේතුවක් නොමැතිව පළමුවන වගඋත්තරකරු කළ නියෝගයක් බවද පෙත්සමේ සඳහන් වෙයි.

එසේම තමන් දැරූ බළන්ගොඩ නගර සභාවේ සභාපතිධූරයේ බලතල සහ කටයුතු ක‍්‍රියාත්මක කිරිමට පළමුවග උත්තරකරු විසින් දෙවන වගඋත්තරකරු වෙත පවරා ඇති බවද පෙත්සමේ සඳහන් කර ඇත.

එසේම තමන් නගර සභා සභාපතිධූය දරණ කාලයේදී සිදුවූ මුල්‍ය වංචා කිහිපයක් සම්බන්‍ධයෙන් විමර්ශනයක් කරන ලෙස පළමුවන වගඋත්තරකරු හතරවන වගඋත්තරකාර විශ‍්‍රාමික මහාධිකරණ විනිසුරු විනිසුරු හේරත් මුදියන්සේලාගේ රෝහණ අනුර කුමාර පත්කර ඇති බවද පෙත්සම්කරු සිය පෙත්සමෙන් කියා සිටී.

පළමුවන වගඋත්තරකාර පළාත් ආණ්ඩුකාර ටිකිරි කොබ්බෑකඩුව මහතා විසින් තම සභාපතිත්වය තාවකාලිකව අත්හිටුවමින් සහ ඒ බලතල දෙවන වගඋත්තරකරුට පවරමින්, පරීක්‍ෂණයක් පැවැත්වීමට විශ‍්‍රාමික විනිසුරුවරයෙක් පත්කිරීමේ තීරණය අත්හිටුවමින් සර්ටියෝරාරි ස්වභාවයේ පරමාධිකාරී විධි නියෝගයක් මගින් ශුන්‍ය හා බලරහිත කරවා ගැනීමට පෙත්සම්කරුට හිමිකම් ඇති බවද පෙත්සම්කරු සිය පෙත්සමෙන් දන්වා සිටී.

පළමුවන වග උත්තරකරු විසින් ලබාදී ඇති තීරණය ක‍්‍රියාත්මක වුවහොත් තමන්ගේ සමාජීය, සහ දේශපාලනික ජීවිතයට මෙන්ම තුන්වන වගඋත්තරකාර සභාවේ අභිවෘද්ධිය වෙනුවෙන් තමන් සැලසුම්කර ඇති ඉදිරි ක‍්‍රියාදාමයන්ට පිරිමැසිය නොහැකි අප‍්‍රතිකාරී අලාභයක් සහ පාඩුවක් සිදුවන හෙයින් මුල්අවස්ථාවේදීම සහ මෙම ඉල්ලිම විමසා අවසන්වන තෙක් පළමුවග උත්තරකරුගේ නියෝගයන් ක‍්‍රියාත්මක කිරිම අත්හිටුවීමේ අතුරු නියෝගයක් ක‍්‍රියාත්මක කරන්නැයි ද පෙතසම් කරු සිය පෙත්සමෙන් ඉල්ලා සිටි.

පෙත්සම විභාග කිරිමට තීරණය කළ මහාධිකරණ විනිසුරුවරිය පෙත්සම්කරු ඉල්ලා ඇති අතරු නියෝගය නිකුත් කරමින් 2021 ජනවාරි 15 දින නිකුත් කරන ලද අංක 2210/50 දරණ ගැසට් පත‍්‍රයෙන්  කළ බළන්ගොඩ නගර සභාවේ සභාපතිධූරයේ කටයුතු කිරීමේ තහනම ඉවත් කිරිමට නිමය කළේය. එසේම නඩුව විමසා අවසන්වන තෙක් යළි එම තනතුරේ කටයුතු කිරිමට පෙත්සම්කරුට ඉඩදෙන ලෙස ද නියම කළාය.

නීතීඥ දමිත අතුකෝරළ මහතා ද පෙත්සම්කරු වෙනුවෙන් පෙනී සිටියේය. මෙම නඩුව ඉක්මනින් අවසන් කළ යුතු නිසා වැඩිදුර විභාගය මාර්තු 17 දිනට කල් තැබිණි.