බය නම් ගෙදර යන්න - අර්ජුන

ශ්‍රී ලංකා දුම්රිය දෙපාර්තමේන්තුවට  අයත් ඉඩම් අයථා ලෙස සහ වංචනිකව භාවිත කරන පුද්ගලයින්ට එරෙහිව නීතිය ක්‍රියාත්මක කිරීමට බියක් ඇත්තේ නම් රාජකාරියට වාර්තා නොකර ගෙදරම නවතින්නැයි අමාත්‍ය අර්ජුන රණතුංග මහතා එම දෙපාර්තමේන්තුවේ නිලධාරීන් හමුවේ ප්‍රකාශ කළේය.

එතුමා මේ බව කියා සිටියේ අද (07) බත්තරමුල්ල ප්‍රවාහන අමාත්‍යාංශ ශ්‍රවණාගාරයේ පැවැති ශ්‍රී ලංකා දුම්රිය දෙපාර්තමේන්තුවේ ප්‍රගති සමාලෝචන රැස්වීමට එක් වෙමිනි.

 එහිදි ඔහු වැඩිදුරටත් සඳහන් කරමින් කියා සිටියේ,

“දුම්රිය ඉඩම් අයථා ලෙස සහ වංචනිකව භාවිත කරන අයට නීතිය ක්‍රියාත්මක කිරීමේ ලිපි යැවීමට ඇතැම් නිලධාරීන් හිතාමතා ප්‍රමාද කරනවා. එසේ කරන්නේ යම් කිසි බියක් නිසා නම් ඒ ලියුම් ටික මට ගෙනෙත් දෙන්න. මම අත්සන් කරලා ලියුම් ටික යවන්නම්. දුම්රියේ ඉඩම් කියන්නේ දුම්රිය දෙපාර්තමේන්තුවේ සම්පතක්. මේ ඉඩම් කළමනාකරණය කිරීමෙන් ලැබෙන ආදායමෙන් මේ මුළු දුම්රිය දෙපාර්තමේන්තුවම පවත්වාගෙන යන්න පුළුවන්. ඒත් ඒ ආදායම ලබා ගන්න දුම්රිය දෙපාර්තමේන්තුවේ ඉඩම් අංශයේ ඇතැම් ඉහළ නිලධාරීන්ට උවමනාවක් නැහැ.

සමහර පුද්ගලයින් දුම්රියේ ඉඩම් අරගෙන පිටස්තර පුද්ගලයින් බදු දීලා ලොකු ආදායමක්  ලබා ගන්නවා. දුම්රිය දෙපාර්තමේන්තුවට ලැබෙන ආදායම මංකොල්ල කනවා. අතරමැදියෝ සල්ලි උපයනවා. ඒක මාෆියාවක්. ඒ මාෆියාවට මේ නිලධාරීනුත් හවුල් බව මම දන්නවා. ඇතැම් ඉඩම් නිලධාරීන් සල්ලි එනවා කියන එකත් රහසක් නෙමෙයි.

මේ ඉඩම් අංශයේ නිලධාරීන් වැටුපක් ගන්නවා නේද ? තමන් කන අදින දෙයට යුතුකම් ඉෂ්ට කරලා ආයතනය රැකගන්න. අපි උත්සාහ කරන්නේ මේ ආයතන විකුණන්නේ නැතිව රැකගන්න. ඒකට මේ හැමෝගෙම උදවු ඕන යනුවෙන් අමාත්‍ය අර්ජුන රණතුංග මහතා  දුම්රිය දෙපාර්තමේන්තුවේ ඉඩම් නිලධාරීන්ගෙන් ඉල්ලා සිටියේය. 

දුම්රිය දෙපාර්තමේන්තුවට ආදායම් අහිමිවීම් අංශ කිහිපයකින් සිදු වනවා. එයින් ප්‍රධානතම අංශයක් වන්නේ දුම්රිය දෙපාර්තමේන්තුව සතුව තිබෙන ඉඩම්වලින් ලැබෙන ආදායම. මේ වනවිට දුම්රිය සතුව දාහතරදහස්  එකසියවිසිනමයක විශාල ප්‍රමාණයක ඉඩම් තියෙනවා. එම ඉඩම්වලින් දුම්රිය ස්ථාන, මාර්ග, ධාවනාගාර සහ කාර්යාල යනාදි ලෙසට දෙපාර්තමේන්තු කටයුතු සඳහා අක්කර අටදාස්  හත්සියපනස්හයක් වෙන් වී තිබෙනවා.

ඒ අනුව බදු දීමට හැකියාව ඇති ඉඩම් ප්‍ර‍මාණය අක්කර පන්දාස් තුන්සියහැටහතරක්. නමුත් දළ වශයෙන් එයින් මේ වනවිට බදු දී තිබෙන්නේ සියයට 10ක පමණ ප්‍ර‍මාණයක්. එනම් අක්කර පන්සියතිස්එකක පමණ ප්‍ර‍මාණයක්. එම ප්‍ර‍මාණය වෙනුවෙන් අය වීමට ඇති මුදල රුපියල් මිලියන දාහතරදාස් හයසියදාහතයි යි දශම අටක් වනවා. නමුත් මේ ආදායම ලබා ගැනීම සඳහා වැඩසටහනක් මීට පෙර තිබුණේ නැහැ. ඒ අනුව ඉඩම් ලේඛනගත කරමින් එම ආදායම ලබා ගැනීමට මේ වනවිට කටයුතු කරමින් සිටිනවා. ”යැයිද අමාත්‍ය අර්ජුන රණතුංග මහතා මෙහිදී වැඩිදුරටත්  පැවසීය.

කෂිනි හපුආරච්චි