පොලිස් නිලධාරීන්ගේ රාජකාරියට බාධා කළ අයෙක් අත්අඩංගුවට

අවිස්සාවේල්ල පොලීසියේ රථවාහන  අංශයේ  නිලධාරීන් දෙදෙනකුගේ  රාජකාරියට බාධා කර පහරදීමට උත්සාහ කළ තිදෙනාගෙන් එක් අයෙකු ඒ මොහොතේම අත්අඩංගුවට ගත් බව අවිස්සාවේල්ල පොලිසිය කියයි 

රථවාහන අනතුරු සංචාරක රාජකාරි කිරීම සඳහා පොලිස් නිලධාරීන් දෙදෙනා අවිස්සාවේල්ල නගරයේදී සිටියදී   අපරික්ෂාකාරී අයුරින් පැමිණි යතුරුපැදිය නැවතීමට සංඥා කර තිබූ අතර පොලිස් අණ නොතකා යතුරුපැදිය ධාවනය කර තිබු බව පොලිසිය කියයි .

පසුව පොලිස් නිලධාරීන් දෙදෙනා මෙම යතුරුපැදිය  අවිස්සාවේල්ල කොළඹ මාර්ගයේ ලංගම ඩිපෝව අසලදී නතර කරගෙන යතුරු පැදියට අදාළ බලපත්‍ර ඉල්ලා සිටි අවස්ථාවේදී  එක් පුද්ගලයෙකු ආරක්ෂක හිස් වැස්මකින්  පොලිස් නිලධාරීන්ට පහර දෙන්න උත්සාහ දරා තිබු බව පොලිස් නිලධාරියෙක් පැවැසීය.

අනතුරුව එම පුද්ගලයන් දෙදෙනා පොලීසියට රැගෙන  එන අවස්ථාවේ දී  අවිස්සාවේල්ල සුපිරි වෙළඳසැලක් අසල  දී තව පුද්ගලයෙකු එම ස්ථානයට  පැමිණ පොලිස් නිලධාරීන්ගේ රාජකාරියට බාධා කරමින් අනෙක් පුද්ගලයන් දෙදෙනා  රැගෙන යාමට උත්සාහ දරා තිබු බව පොලිසිය කියයි .

එම අවස්ථාවේදී  පොලිස් නිලධාරීන් දෙදෙනා එක් පුද්ගලයෙකු  අල්ලාගෙන ඒ බව පොලිසියට දැනුම්දී ඇති අතර පොලිස් නිලධාරීන් එම ස්ථානයට පැමිණෙන  විට  සෙසු පුද්ගලයන් දෙදෙනා පලාගොස් තිබූ බව පොලිසිය කියයි 

පළා ගිය පුද්ගලයන් දෙදෙනා  හා අත්අඩංගුවට ගත් සැකකරු මත්පැන් පානය කර සිටි බවට අනාවරණය  වී තිබූ බව පොලිසිය කියයි 

  බිමල් ශ්‍යාමන් ජයසිංහ