පොලිස් නිලධාරීන් 600කට කොවිඩ් ආසාදිතයි

පොලිස් නිලධාරීන් 600කට ආසන්න සංඛ්‍යාවකට කොවිඩ් ආසාදනය වී ඇති බවත් පසුගිය දින 4ක කාලය තුල පොලිස් සමාජයෙන් කිසිම ආසාදිතයෙක් වාර්තා වී නොමැති බවත් පොලිස් මාධ්‍ය ප්‍රකාශක, නියෝජ්‍ය පොලිස්පති අජිත් රෝහණ මහතා පැවැසීය.

“පොලිස් නිලධාරීන් 600කට ආසන්න සංඛ්‍යාවක් කොවිඩ් ආසාදිතයන් බවට වාර්තා වීම සම්බන්ධයෙන් නොයෙකුත් ප්‍රවෘත්ති පළවනවා. පසුගිය දින හතරක පමණ කාලයක් තුළ පොලිස් සමාජයෙන් කිසිම ආසාදිතයෙක් වර්තා වුණේ නෑ.

බොරැල්ල පොලීසියෙන් ආසාදිතයන් වාර්තාවීමත් සමග පොලිස් විශේෂ කාර්ය බළකා කඳවුරු ආශ්‍රිතව රෝගීන් වාර්තා වුණා. එම ආසාදිතයන් හා සමීප ආශ්‍රිතයින් වෙන් කර පොලිස් නිලධාරීන් 3000ක් පමණ නිරෝධායනයට ලක්කර තිබෙනවා.

පොලිස් සේවයේ 90000කට ආසන්න සංඛ්‍යාවක් සේවයේ නිරත වෙනවා. ඒ අතරින් 87000ක් පමණ සාමාන්‍ය පරිදි සේවයේ නිරත වෙනවා. දැනට දින 10ක පමණ කාලය තුළ නිරෝධායන කඳවුරු වල සිටින අයගෙන් කොවිඩ් ආසාදිතයන් වාර්තා වෙනවා.

පොලිස් සමාජයෙන් කොවිඩ් ආසාදිතයන් වාර්තා වෙන්නේ නෑ. මේ පිළිබඳව නිරන්තයෙන් අවධානය යොමුකරනවා. පොලිස් නිලධාරීන්ගේ හා මහජනතාවගේ ආරක්ෂාව ගැන නිරන්තරයෙන් කටයුතු කරනවා”