පොලිස් අණ තොතැකූ ලොරියට වෙඩි

ලොරියක් පරීක්ෂා කිරීම සඳහා නැවැත්වීමට එහි රියැදුරුට අණ කළද එම අණ නොතකා ධාවනය කිරිම හේතුවෙන් ලොරියේ පසුපස ටයරයකට වෙඩි තැබීමට අද (07දා) කරුවලගස්වැව පොලීසිය කටයුතු කර තිබේ.

කරුවලගස්වැව පොලිස් වසමට අයත් තබ්බෝව පංසල හන්දිය ප්‍රදේශයේදී අලුයම තුනහමාරට පමණ මෙම වෙඩි තැබීම සිදුකර තිබේ.

වෙඩි වැදීමට ලක් වූ ලොරිය තවදුරටත් ඉදිරියට කිලෝ මීටර් තුනක් පමණ පුත්තලම - අනුරාධපුර මාර්ගයේ තබ්බෝව හතේ කණුව දෙසට ධාවනය කරවා ඇති එහි රියැදුරා අනතුරුව අතුරු මාර්ගයක් ඔස්සේ ද ටික දුරක් ලොරිය ධාවනය කර ඇත.

වෙඩි වැදී තිබූ ටයරක හුළං බැසීම නිසා ලොරිය පෙරළී ඇති බවත්, එම නිසා රියැදුරා ඇතුළු එහි සිටි පිරිස දැව ලොරිය අතහැර පළා ගොස් ඇති බවටත් මූලික විමර්ශනවල දී අනාවරණය වී  ඇති බව කරුවලගස්වැව පොලීසිය පැවසීය.

වානාතවිල්ලුව දෙස සිට තබ්බෝව හරහා පුත්තලම -අනුරාධපුර පාර, 7 කණුව දෙසට දැව කදන් තොගයක් පටවා ගත් ලොරියක් පැමිණෙන බවට කරුවලගස්වැව පොලීසියට ලැබුණ තොරතුරක් මත එම ලොරිය නැවැත්වීම සඳහා අණකර තිබියදී එම අණ නොතකා ලොරිය ධාවනය කිරීම හේතුවෙන් මෙම වෙඩි තැබීම සිදුකර තිබේ.

කරුවලගස්වැව ජයරත්න වික්‍රමාරච්චි