ප්‍රථම නිරෝධායන මධ්‍යස්ථානය හැඳල ලාදුරු රෝහල

කොරෝනා වෛරසය සීඝ්‍රයෙන් පැතිරෙන  ඉරානය, දකුණු කොරියාව සහ ඉතාලියේ සිට මෙරටට පැමිණෙන සියළු මගීන් දින 14 ක් නිරෝධානයකට ලක් කිරීමට සඳහා හැඳල ලාදුරු රෝහල යොදා ගැනීමට තීරණය කර තිබේ. ඒ අනුව ශ්‍රී ලංකාවේ කෝරෝනා ආසාදිතයන් සඳහා වෙන්කරන ප්‍රථම ථම නිරෝධායන මධ්‍යස්ථානය බවට එය පත්වෙනු ඇත.

මේ පිළිබදව අදහස් දැක්වූ සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය අනිල් ජාසිංහ මහතා “කොරෝනා වෛරසය පිළිබඳව ජාතික ක්‍රියාකාරී ආරක්ෂක කමිටුව ගනු ලැබූ තීරණයකට අනුව ඉරානයෙන්, දකුණු කොරියාවෙන් සහ ඉතාලියෙන් ගුවන් මගින් පැමිණෙන මගීන් සියලු දෙනා දින 14 ක් නිරෝධානයකට ලක් කරනවා.

එම තීරණය ගැනීමෙන් පසු අප විසින් මෙම නිරෝධායන මධ්‍යස්ථාන පිළිබදව සිදු කළ සාකච්ඡාවට අනුව දැනට අපි එක් නිරෝධායන මධ්‍යස්ථානයක් ලෙස  හැදල ලාදුරු රෝහල් පරිශ්‍රය තෝරාගෙන තිබෙනවා.

නිරෝධායන කටයුතු සදහා මේ පරිශ්‍රය ඉතා සුදුසු ස්ථානයක්. මීට පෙර වූහාන් වල සිටි සිසුන් ශ්‍රී ලංකාවට ගෙනවිත් දියතලාව ප්‍රදේශයේ දී නිරෝධානයට ලක් කරනු ලැබුවා. නිරෝධානයට ලක් කරන්නේ රෝගී වූ පිරිස් නොවෙයි. රෝගී තත්ත්වයේ නැති පිරිස්.

වෛරසය වැළදී තිබෙනවා නම් ඔවුන් නිරෝධායනට නොවෙයි ලක් කරන්නේ රෝහල් ගත කිරීමයි සිදු කරන්නේ. නිරෝධායනයට ලක් කරන්නේ ඔවුන්ට රෝගී තත්ත්වයක් නැති වුනත් යම් කිසි ආකාරයෙන් කිසිවෙතු තුළ කොරෝනා වෛරස විෂබීජය තිබෙනවා නම් ඒ් විෂබීජය දින 14 ක් තුළ පවතින නිසා. ඉන් පසු එම වෛරසය පවතින්නේ නැහෑ.

ඒ කාලය ගත කිරීමට තමයි මෙසේ එක් ස්ථානයක එම පිරිස් රදවනු ලබන්නේ. මේ ශ්‍රී ලංකා රජය ගත් තීරණයක්. මෙම හැදල නිරෝධායන මධ්‍යස්ථානය සකසුරුවම් කිරිම සදහා ශ්‍රී ලංකා යුධ හමුදාවේ සම්පූර්ණ සම්බන්ධතාවය ලබාගන්නවා. සෞඛ්‍ය කාර්ය මණ්ඩල එහි රාජකාරි සිදු කරනු ලබනවා.

රඳවා සිටින කාලය තුළ එම පිරිස් වෙත සියලු පහසුකම් ලබාදීමට කටයුතු කරනවා. මෙම වෛරසය මේ ආකාරයට පාලනයට ලක් කරන්නේ නැතිව ඉහත රටවල මේ රෝගය විශාල ලෙස පැතිර යනවිට අප රටක් වශයෙන් නිහඩව සිටියොත්, මෙවැනි ක්‍රියාමාර්ග නොගත්තොත් අපි නොදැනුවත්වම මෙම වෛරසය රට තුලට පැතිරෙන්න පුළුවන්.  පසුව පාලනය කරගත නොහැකි තත්ත්වයකට පත් වෙන්නට පුළුවන්.

එබැවින් විද්‍යානුකූලව ගත යුතු පියවර තමයි අප ගනු ලබන්නේ. මෙහිදී හැඳල ලාදුරු රෝහල අවට ජනතාවට හෝ කිසිම අයෙකුට කිසිම ආකාරයේ සෞඛ්‍යමය ගැටලුවක් ඇති නොවන ආකාරයට විද්‍යාත්මකව තහවුරු කර වගකීමෙන් යුතුව ප්‍රකාශ කරනවා.

මේ තීරණය ගනු ලබන්නේ නිරෝධායන හා රෝග වැළැක්වීමේ ආඥා පනතට අනුව සෞඛ්‍ය සේවා අධ්‍යක්ෂ ජනරාල්වරයාට පැවැරී ඇති බලතල අනුව නීතිප්‍රකාරවයි. මේ සදහා සියලු ආයතනවල, ජනතාවගේ සහයෝගය අනිවාර්යයයෙන්ම සෞඛ්‍ය අංශ වෙත ලැබිය යුතුයි.”