නාවලපිටිය නගර සභාවේ සභාපතිවරයා ඇතුළු හත් දෙනෙක් පොලිස් අත්අඩංගුවට

නාවලපිටිය නගර සභාවේ සභාපති සසංක සම්පත් සංජිව මහතා ඇතුළු (එජාප) ඔහුගේ හිතවතුන් කිහිප දෙනෙකු ගිනිගත්හේන අඹගමුව ප්‍රදේශයේ පිහිටි සංචාරක හෝටලයකදි ඊයේ  (30) දින අත්අඩංගුවට ගත් බව ගිනිගත්හේන පොලීසිය පැවසිය.

නාවලපිටිය නගර සභාවේ සභාපතිවරයා ඇතුළු ඔහුගේ සමිපතම හිතවතුන් හත් දෙනෙකු ගිනිගත්හේන පොලිස් වසමට අයත් අඹගමුව සංචාරක හෝටලයක නිරෝධායන රෙගුලාසි උල්ලංඝනය කරමින් අධික ලෙස රා පානය කර මුදල් ඔට්ටුවට සුදු ක්‍රිඩා කරමින් සිටින බවට හැටන් පොලිස් කොට්ඨාස  දුෂණ මර්දන ඒකකයේ නිලධාරින්ට ලද තොරතුරක් මත වටවල සහ ගිනිගත්හේන පොලිස් ස්ථාන වල නිලධාරින් එකාබද්ධව වැටලිමක් සිදු කර සැකකරුවන් අටදෙනා අත්අඩංගුවට ගෙන ඇත.

වැටලිම සිදු කරන අවස්ථාවේ මුදල් ඔට්ටුවට සුදු ක්‍රිඩා කිරිමට භාවිතා කල මුදල් , රා බෝතල් කිහිපයක්  සහ සභාපතිවරයාගේ පුද්ගලික වාහනය සහ ඔහුගේ හිතවතුන් පැමිණි මොටර් රථ දෙකක්  පොලිස් භාරයට ගෙන ඇත.

වැටලිම සිදු කරන අවස්ථාවේ සැකකරුවන් කිහිප දෙනෙකු පලා ගිය බවත්, එම සැකකරුවන්ද අත්අඩංගුවට ගැනිමට මෙහෙයුමක් දියත් කර ඇති බවයි හැටන් පොලිස් කොට්ඨාස  දුෂණ මර්දන ඒකකයේ නිලධාරින් කියා සිටියේ.

අත්අඩංගුවට ගත් සැකකරුවන් අතර  සංචාරක හෝටලයේ මුරකරුද වන අතර , සෙසු සැකකරුවන් නාවලපිටිය , නෝටන්බ්‍රිජ් කලවැල්දෙණිය , සහ හැටන් ප්‍රදේශ වල පදිංචිකරුවන් බවයි පොලීසිය කියා සිටියේ.

අත්අඩංගුවට ගත් සැකකරුවන් අද  (01) දින හැටන් මහෙස්ත්‍රාත් අධිකරණය වෙත ඉදිරිපත් කිරිමට නියමිතයි.