දුම්රියට බහාලුම් හා ඉන්ධන ප්‍රවාහන ගැල් ආනයනය කරයි

ශ්‍රී ලාංකේය දුම්රිය දෙපාර්තමේන්තුවට වසර තිහකට පසුව බහළුම් ප්‍රවාහන ගැල් දහයක් අද අලුයම මෙරටට (16) ආනයනය කෙරිණ. ඒ කොළඹ වරායේ බණ්ඩාරනායක පර්යන්තයෙනි. දැනට ශ්‍රී ලංකා දුම්රිය දෙපාර්තමේන්තුව සතුව ඇති බහළුම් ප්‍රවාහන ගැල් (container carrier wagon) සංඛ්‍යාව 25කි. එම ඇණිය වැඩිකර ගැනීම සඳහා ඉන්දීය ණය යෝජනා ක්‍රමය යටතේ බහළුම් ප්‍රවාහන ගැල් 20 ක් මෙරටට ආනයනයට ප්‍රවාහන සහ සිවිල් ගුවන්සේවා අමාත්‍යාංශය අපේක්ෂා කරයි. අද අලුයම කොළඹ වරායෙන් ගොඩ බෑවේ එහි පළමු අදියර යටතේ ගෙන්වූ බහළුම් ප්‍රවාහන ගැල් දහය වෙයි. අඩි 40 බහාළුම් ප්‍රවාහනය කළ හැකි එම ගැලක වටිනාකම ඇ.ඩො. 84, 200 කි. ශ්‍රී ලංකා මුදලින් ආසන්න වශයෙන් රුපියල් මිලියන 15 ක් වෙයි.

බහළුම් ප්‍රවාහන දුම්රිය ගැල් අද ලංකාවට ගෙන ආවේ MIIKE PANAMA නෞකාවෙනි. එම නෞකාවෙන් ඉන්ධන ප්‍රවාහන ගැල් 05ක්ද අද ලංකාවට ‍ආනනයන කෙරිණ. එයද ඉන්දීය ණය යෝජනා ක්‍රමය යටතේය. ඒ යටතේ ආනයනය කිරීමට අපේක්ෂිත මුළු ඉන්ධන ප්‍රවාහන ගැල් සංඛ්‍යාව 30ක් වේ. එහි එක් ඉන්ධන ප්‍රවාහන ගැලක වටිනාකම ඇ. ඩො 85500 කි. ආසන්න වශයෙන් ශ්‍රී ලංකා මුදලින් නම් රු.මි. 15.2ක් වේ. ඉන්ධන ලීටර් 45000 ක් (ගැලුම් 10000ක්) එක් ගැලකින් ප්‍රවාහනය කළ හැකිය. මීට පෙර එවැනි ඉන්ධන ගැල් ආනනයක කර ඇත්තේ 2008 වසරේදී පාකිස්ථානයෙනි.

මේ වන විට ඉන්ධන අතුළු භාණ්ඩ ප්‍රවාහනයෙන් වාර්ෂිකව දුම්රිය දෙපාර්තමේන්තුව උපයන අදායමේ ප්‍රතිශතය 2% කි. ඉන්ධන ප්‍රවාහනයෙන් දුම්රිය දෙපාර්තමේන්තුව උපයන ආදායම දැනට 22% ප්‍රතිශතයකි. කටුනායක ගුවන්තොටුපලට ගුවන්යානා ඉන්ධන ප්‍රවාහනය අතුළුව අනෙකුත් ප්‍රදේශවලට කරනු ලබන ඉන්ධන ප්‍රවාහනය එයට ඇතුලත් වේ. දුම්රිය දෙපාර්තමෙන්තුවට ඉන්ධන ප්‍රවාහනය සඳහා වත්මන යොදා ගැනීමට ඇත්තේ ගැල් සංඛ්‍යාව 160 කි.