ත්‍රස්ත ක්‍රියාවන්ට සම්බන්ධ වූවන්ට තරාතිරම නොබලා මරණිය දණ්ඩනය දිය යුතුයි - සජිත්

ත්‍රස්තවාදි හා අන්තවාදී ක්‍රියා  සිදුකරන හෝ ඊට අනුබල දෙන ඕනෑම පුද්ගලයෙකුට ඔවුන්ගේ තරාතිරම නොබලා මරණීය දණ්ඩනය ලබා දිය යුතු බව නිවාස, ඉදිකිරීම් හා සංස්කෘතික කටයුතු අමාත්‍ය සජිත් ප්‍රේමදාස මහතා අවධාරණය කරයි.

සජිත් ප්‍රේමදාස අමාත්‍යවරයා මෙම අදහස් පළකළේ රුපියල් ලක්ෂ 1,000ක වියදමින් ඉදිකළ හම්බන්තොට දිස්ත්‍රික්කයේ, සූරියවැව මහජන පොළ ජනතා අයිතියට පත් කිරීමේ අවස්ථාවට අද (16) දින සහභාගී වෙමිණි.

පාස්කු ඉරිදා සිදුවූ ත්‍රස්ත ප්‍රහාරය උපයෝගී කර ගනිමින් රට තුළ තවත් ඛේදවාචකයක් ඇති කර රට ගිනි තැබීමට දේශපාලන හස්ත රැසක් ක්‍රියාත්මක වෙමින් පවතින බවත්, ත්‍රස්තවාදි  හා අන්තවාදී ක්‍රියා  උපයෝගී කර ගනිමින් තම දේශපාලන ප්‍රතිරූපය ගොඩනගා ගැනීමට ඔවුන් උත්සාහ කරන බව අමාත්‍යවරයා පැවසීය.

83 කළු ජූලිය සමඟ ද්‍රවිඩ ජනතාවගේ නිවාස, දේපළ, ව්‍යාපාරික ආයතන හා ජීවිත රැසක් විනාශ වූ අතර එම සිදුවීමෙන් අනතුරුව L.T.T.E. ත්‍රස්තවාදි සංවිධානයට නොසිතූ අයුරුන් පිරිස් එකතු වී එහි ශක්තිය වැඩි වූ බවත්  පැවසීය.

ඉකුත් පාස්කු ඉරිදා ත්‍රස්ත ප්‍රහාරයෙන්  පසුව රට තුළ කැරලි කෝලාහල ඇති කිරීම තුළින් ISIS ත්‍රස්තවාදීන්ට එලෙස ශක්තිය ලබා දෙනවාද කියා රටේ ජනතාව බුද්ධිමත්ව සිතා බැලිය යුතු බවත්, මෙලෙස කැරලි කෝලාහල ඇතිවීම තුළින් තවත් කොපමණ පිරිසක් ISIS බඳවා ගැනීමේ පෝලිමට එක්වේවිද කියා තමන්ට සිතෙන බවත් අමාත්‍යවරයා මෙහිදී වැඩිදුරටත් පැවැසීය.

කෂිනි හපුආරච්චි