තංගල්ල බස්නැවතුම්පොළ උඩුමහලේ දුරකතන අලෙවිසැල් දෙකකට පැමිණි අය සොයයි

කොවිඩ්-19 ආසාදනය වී ඇති බවට තහවුරු වූ නාවික හමුදා නිලධාරියකු පැමිණි බව කියන තංගල්ල බස් නැවතුම්පළේ පිහිටි ජංගම දුරකතන අලුත්වැඩියා කරන ස්ථාන දෙකකට ඉකුත් 22,23 සහ 24 දිනයන්හීදි පැමිණි අයවලුන් සිටි නම් හැකි ඉක්මනින් තංගල්ල සෞඛ්‍ය වෛද්‍ය නිලධාරී කාර්යාලය දැනුවත් කරන ලෙස එම කාර්යාලය කියයි.

වැලිසර නාවික හමුදා කඳවුරේ සිට තංගල්ල බලා නාවික හමුදා නිලධාරින් පිරිසක් සමඟ පැමිණි බස් රථයක සිටි නිලධාරියකු ඉකුත් 22 වැනිදා තංගල්ල නගරයේ බස් නැවතුම්පොළෙහි උඩුමහළෙහි පිහිටි “ෆියුචර් කැෆේ කමියුනිකේෂන්” සහ “බෝගහවත්ත කමියුනිකේෂන්” යන ජංගම දුරකතන අලුත්වැඩියා කරන ආයතන දෙකට ගොස් ඇතැයි අනාවරණය වී ඇති බව තංගල්ල සෞඛ්‍ය වෛද්‍ය නිලධාරී ජගත් ගජධීර මහතා කියයි.

එලෙස පැමිණි නිලධාරියා ඊයේ (24) දිනයේදී  කොවිඩ් -19 ආසාදනය වී ඇති බවට සෞඛ්‍ය අංශ තහවුරු කර ගෙන තිබීම හේතුවෙන් ඉකුත් 22 වැනිදා සිට 24 දක්වා කාලය තුළ එම ජංගම දුරකතන අලෙවිසැල් දෙකට ගමන් කළ සියලුම දෙනාට රෝග බෝවීමේ අවදානමක් ඇතැයිද වෛද්‍ය ගජධීර මහතා කියයි. මේ හේතුවෙන් එලෙස පැමිණි යම් අයෙක් වෙතොත් වහාම තංගල්ල සෞඛ්‍ය වෛද්‍ය නිලධාරි කාර්යාලය දැනුම්වත් කරන ලෙසද ඒ මහතා ඉල්ලා සිටියි.

අනිෂා මානගේ