ගමන් බලපත්‍රයක් නොමැතිව ඇතුළු වූ විදේශ ජාතිකයෙකු පිටුවහල් කෙරේ

ශ්‍රී ලංකාව තුළ සංචාරය කිරීමේ නිශ්චිත සංචාරක සැළැස්මක් සහ එම සංචාරයෙන් පසු ආපසු පිටව යෑම සදහා ගුවන් ප්‍රවේශ පත්‍රයක් නොමැතිව, ශ්‍රී ලංකාවට පැමිණීමට උත්සාහ කළ බෙනින් රාජ්‍යයේ ගුවන් මගියෙකු අද (25) දින උදෑසන, ඔහු පැමිණි ගුවන් යානයෙන්ම ආපසු පිටුවහල් කිරීමට කටුනායක ගුවන් තොටුපළ ආගමන විගමන දෙපාර්තමේන්තු නිලධාරීන් පියවර ගෙන තිබේ.

මොහු 41 හැවිරිදි වියේ පසුවන, එරට සුවද විළවුන් ව්‍යාපාරිකයෙක් වන අතර,   ඔහු දකුණු අප්‍රිකානු රාජ්‍යයක් වන බෙනින් සිට නයිජීරියාවට පැමිණ, එතැන් සිට කටාර් රාජ්‍යයට පැමිණ තිබේ . ඉන්පසුව ඔහු  අද (25)  දින උදෑසන 9.20 ට දෝහා සිට පැමිණි කටාර් ගුවන් සේවයේ කිව්.ආර්.- 664 දරන ගුවන් යානයෙන් කටුනායක ගුවන් තොටුපළ වෙත පැමිණ තිබුණි.

මොහු ශ්‍රී ලංකාවේ සංචාරයක් සදහා පැමිණෙන බව ප්‍රකාශ කළ ද, ඒ සදහා නිශ්චිත සංචාරක සැළැස්මක් ඔහු සතුව නොවීම මෙන්ම ඔහු ශ්‍රී ලංකාවේ ගත කරන කාළය තුළ ඔහු නවාතැන් ගැනීමට නියමිත හෝටල් සදහා ඇනවුම් කිරීමක් හෝ වෙන්කිරීමක් සිදු නොකළ අතර, එම කාළය තුළ එක් හෝටලයක් පමණක් සදහන් කර තිබුණි.

එසේම මෙම සංචාරයෙන් අනතුරුව, ඔහුට ආපසු පිටත්ව යෑම සදහා ගුවන් ප්‍රවේශ පත්‍රයක් ද නොවීම ද ගුවන් තොටුපළ ආගමන විගමන දෙපාර්තමේන්තු නිලධාරීන්ගේ අවධානයට ලක් විය.

මීට පෙර මේ ආකාරයට නිශ්චිත සංචාරක සැළසුම් නොමැතිව , ශ්‍රී ලංකාවේ සංචාරය කිරීමට පැමිණෙන බව හගවමින් ශ්‍රී ලංකාවට පැමිණි බොහෝ අප්‍රිකානු ජාතිකයන් ක්‍රෙඩිට් කාඩ් පත් වංචා , මුදල් වංචා වැනි නීතිවිරෝධී කටයුතු වල නියැලී, දැනට මිරිහාන රැදවුම් මධ්‍යස්ථානයේ රදවා තබා සිටිති .

ඒ අනුව මෙම බෙනින් ජාතික ගුවන්ජ්බ්ල්බ්  ද, නීත්‍යානුකූලව මෙරට සංචාරය කිරීමට පැමිණි අයෙකු නොවන බව තහවුරු වීමෙන් පසුව , ඔහු පැමිණි ගුවන් යානයෙන්ම , එනම් කටාර් ගුවන් සේවයේ කිව්.ආර්. - 665 දරන ගුවන් යානයෙන් උදෑසන 10.50 ට යළිත් ආපසු දෝහා බලා පිටුවහල් කිරීමට ගුවන් තොටුපළ ආගමන විගමන දෙපාර්තමේන්තු නිලධාරීන් පියවර ගෙන තිබුණි .

 කටුනායක ගුවන් තොටුපළ ආගමන විගමන සහකාර පාලක සුජීව රත්නායක මහතාගේ උපදෙස් මත, ප්‍රධාන ආගමන විගමන නිලධාරී ඩී.එස්.ඒ.දෙහිවත්ත මහතාගේ අධීක්ෂණය යටතේ ආගමන විගමන නිලධාරී පී.ජී.ජී.ඊ.චමිලා මහත්මිය මේ පිළිබඳව විමර්ශන කටයුතු සිදු කළහ.

ටී.කේ.ජී.කපිල