ඔලුවිල් නිරෝධායන මධ්‍යස්ථානයේ සිටි තවත් පුද්ගලයින් සිවු දෙනෙකුට කොරෝනා

නාවික හමුදාව විසින් පවත්වාගෙන යනු ලබන ඔලුවිල් නිරෝධායන මධ්‍යස්ථානයේ නිරෝධායන කටයුතු සඳහා යොමු කර සිටි පුද්ගලයින්ගෙන් තවත් පුද්ගලයින් සිව් දෙනෙකුට කොරෝනා වෛරසය ආසාදනය වී ඇති බව සිදු කල පරීක්‍ෂණ මගින් සොයා ගැනීමට හැකි වීමත් සමග ඔවුන් කඩිනමින් ප්‍රතිකාර සඳහා යොමු කිරීමට නාවික හමුදාව ඊයේ ( 30)  දින කටයුතු කරන ලදි.

ජා ඇල සුදුවැල්ල ග්‍රාමයේ කොරෝනා වෛරසය ආසාදිතයෙකු ඇසුරු කල පුද්ගලයින් පිරිසක් නාවික හමුදා බුද්ධි මෙහෙයුමකින් නාවික හමුදා භාරයට ගෙන විධිමත් නිරෝධායන ක්‍රියාවලියකට යොමු කිරීම සඳහා ඔලුවිල් ප්‍රදේශයේ ස්ථාපිත සියලු  පහසුකම් වලින් සමන්විත නාවික හමුදා නිරෝධායන මධ්‍යස්ථානය වෙත රැගෙන යාමට කටයුතු කරන ලදි.

පසුව නිරෝධායන මධ්‍යස්ථානය තුල නිරෝධායනය සඳහා යොමු කර සිටි පිරිසෙන් කිහිපදෙනෙකුට වෛරසය ආසාදනය වී ඇති බවට තහවුරු කර ගැනීමත් සමඟ එම මධ්‍යස්ථානයේ සිටි අනෙක් පිරිසද පීසීආර් පරීක්‍ෂණ සඳහා යොමු කිරීමට කටයුතු කරන ලදි. එහිදී සිදු කල පරීක්‍ෂණ මගින් තවත් පුද්ගලයන් සිවු  දෙනෙකුට කොරෝනා වෛරසය ආසාදනය වී ඇති බවට තහවුරු කර ගැනීමට හැකිවිය.

ඒ අනුව, වෛරසය ආසාදනය වී ඇති බවට තහවුරු කර ගත් ආසාදිතයින් කඩිනමින් ඉදිරි ප්‍රතිකාර කටයුතු සඳහා ඊයේ ( 30 ) කාත්තන්කුඩි මහ රෝහල වෙත ගිලන් රථයක් මගින් රැගෙන යාමට කටයුතු කරන ලදි.