ඒකාබද්ධය ඉදිරි මැතිවරණවලට පොහොට්ටුවෙන්

ඒකාබද්ධ විපක්ෂය ප්‍රමුඛ ශ්‍රී ලංකා පොදුජන පෙරමුණඉදිරි මැතිවරණවලට පොහොට්ටුව ලකුණින් ඉදිරිපත් වන බවත්,කුඩා පක්ෂයක් යටතේ තරග කිරීමට තම පක්ෂය සූදානම් නොමැති බවත් ශ්‍රී ලංකා පොදුජන පෙරමුණේ මහ ලේකම් අධිනීතීඥ සාගර කාරියවසම් මහතා ඊයේ (05දා) පැවසීය.

මේ වනවිට පොදුජන පෙරමුණ වටා ජනතාව තබා ඇති විශ්වාසය කිසිලෙසකින් කඩ නොකරන බවත්,ඉතිහාසයේ කිසි දිනෙක ප්‍රධාන පක්ෂයක් කුඩා පක්ෂයක් යටතේ තරග කර නොමැති බවත් මහ ලේකම්වරයා සඳහන් කළේය.

ශ්‍රී ලංකා නිදහස් පක්ෂයට අවශ්‍යතාවක් තිබේනම් තම පක්ෂය සමග සන්ධානගතවීම සඳහා සාකච්ඡා කළ හැකි බවද ඒ මහතා ප්‍රකාශ කළේය.

බත්තරමුල්ල, නෙළුම් මාවතේ පිහිටි ශ්‍රී ලංකා පොදුජන පෙරමුණේ ප්‍රධාන කාර්යාලයේ පැවැති මාධ්‍ය හමුවකදී ඔහු ‌‌මේ බව සඳහන් කළේය.