ඉරණතිව් කොරෝනා සිරුරු භූමදානයට එරෙහිව විරෝධතා ඇරඹේ

කොවිඩ් වෛරසයෙන් මිය ගිය සිරුරු ඉරණතිව් දූපතේ වලදැමීමට රජය විසින් ගෙන ඇති තීරණයට එරෙහිව දැඩි විරෝධයක් පල කරමින් අද (03) උදෑසන ඉරණතිව් දූපතට පිවිසෙන් ඉරණමාතා නගර් ප්‍රදේශයේදී විරෝධතාවක් සංවිධානය කොට තිබුණි.

ඉරණතිව් දූපතට පිවිසිය යුතු ප්‍රධාන ගම්මානය ඉරණමාතා  ප්‍රදේශය වන අතර ඉරණමාතා ගම්මානයේ කතොලික පියතුමන්ලා සහ ස්වේච්ඡා සංවිධාන මෙන්ම ගම්වාසීන් එක්ව අද දින මෙලෙස විරෝධතාවය සංවිධානය කොට තිබුණි.

කෙසේ වෙතත් විරෝධතා කරුවන්ට ඉරණතිව් දූපතට යාමට මෙතෙක් අවසරය නොලැබීම හේතුවෙන් විරෝධතාකරුවන් මේ වන තුරුත් ඉරණමාතා නගර් ප්‍රදේශයේ විරෝධතාවයේ නිරතව සිටින අතරම අද සවස වන විට ඉරණතිව් දූපතටද ගොස් විරෝධතාවක් පැවත්වීමට ඉරණමාතා නගර් ප්‍රදේශයේ වැසියන් සහ ඉරණතිව් දූපත් වාසීන් සූදානමින් සිටිති.

විරෝධතාවයේ නිරත වූ ඉරණමාතා නගර් ප්‍රදේශයේ වැසියන් වැඩිදුරටත් පවසා සිටියේ,

‘යුද්දෙන් පසුව 2017 වසරේදී ඉරණතිව් දූපතට නැවත පදිංචියට ගිය වැසියන්ගෙන් මේ වන විට ෙනැවත පදිංචි පවුල් 108 කට අයත් පුද්ගලයින් 335 දෙනෙකු ජීවත්ව සිටින බවටත් එහි සිටින කිසිදු වැසියෙකු මේ වන තුරුත් කොරෝණා ආසාදිත හෝ බලපෑමකට ලක්ව නොමැති අවස්ථාවක කොරෝනා සිරුරු දූපතේ වල දැමීම හේතුවෙන් ඉරණතිව් වැසියන් දැඩි අවධානමකට ලක්වන බැවින් කොරෝණා සිරුරු දූපතේ වලදැමීමේ තීරණය වහාම නතර කළ යුතු බවටය.

මේ අතර කොරෝනා සිරුරු වලදැමීමට යැයි හාරන ලද සැකසහිත වලවල් කිහිපයක් ඉරණතිව් වැසියන් පිරිසක් විසින් වසා දැමීමටද පියවර ගෙන තිබුණි.