ඉන්ධන හිඟයක් මවාපාන ඉන්ධන හිමියන්ට අනතුරු ඇඟවිමක්

ඉන්ධන සැඟවීමට උත්සාහ කළහොත් ඉන්ධන අලෙවි බලපත‍්‍රය වහාම අහෝසි කරන්නැයි විදුලි බල හා බලශක්ති අමාත්‍ය මහින්ද අමරවීර මහතා නිලධාරින්ට උපදෙස් දි තිබේ.

කිසියම් පිරිසක් කෘති‍්‍රම ඉන්ධන හිඟයක් මවා පෑමට කටයුතු කරමින් සිටින බවත්, මේ වන විට ඇතැම් ඉන්ධන අලෙවිසැල් ඉදිරිපිට වාහන පෝලිම් ඇති බවටත් විදුලි බල හා බලශක්ති අමාත්‍යාංශයට වාර්තා වී ඇත.

නමුත් මේ වන විට දිවයිනේ කිසිදු ඉන්ධන හිඟයක් නොමැති අතර අතිවිශාල ඉන්ධන තොග ලංකා ඛණිජ තෙල් නීතිගත සංස්ථාව සතුව පවති. කිසියම් අයෙක් ඉන්ධන සඟවා තබා ගනිමින්, ඉන්ධන හිඟයක් මවා පෑමට කටයුතු කරන්නේනම් ඔවුන්ගේ ඉන්ධන බලපත‍්‍රය වහාම අහෝසි කරන ලෙස විෂයභාර අමාත්‍ය මහින්ද අමරවීර මහතා අමාත්‍යාංශයේ නිලධාරින්ට උපදෙස් දි තිබේ.

එමෙන්ම ඉන්ධන හිඟයක් පිළිබදව අනවශ්‍ය බියක් ඇති කර නොගන්නා ලෙසත් කිසිදු හිඟයකින් තොරව ඉන්ධන ලබා දීමට අවශ්‍ය තොග ලංකා ඛණිජ තෙල් සංස්ථාව සතුව පවතින බවත් අමාත්‍යවරයා සඳහන් කරයි.